បារាំង បើក​កិច្ច​ពិភាក្សាបន្ទាន់ជាមួយ​អ៊ីស្រាអែល​ និង​លីបង់ ដើម្បីបញ្ចៀស​សង្គ្រាមជើង​គោក

ប្រធានាធិបតីបារាំង លោក អេម៉ានុយអែល ម៉ាក្រុង បានកោះប្រជុំពិភាក្សាគ្នាយ៉ាងតានតឹងជាមួយនាយករដ្ឋមន្ត្រីអ៊ីស្រាអែល លោក បេនយ៉ាមីន ណេតាន់យ៉ាហ៊ូ រួមជាមួយប្រធានាធិបតីលីបង់ លោក Joseph Aoun និងនាយករដ្ឋមន្ត្រី លោក Nawaf Salam ដើម្បីរកច្រកចេញ​​ឲ្យ​វិបត្តិដែលកំពុងឆេះសន្ធោសន្ធៅនៅក្នុងប្រទេសលីបង់។ នេះ​បើ​យោង​តាម​ការ​ផ្សាយ​របស់ Jerusalem Post នា​ថ្ងៃ​ព្រហស្បតិ៍​ទី​៥​ខែ​មីនា​ឆ្នាំ​២០២៦។

នៅក្នុងសេចក្តីថ្លែងការណ៍លើបណ្តាញសង្គម X លោកម៉ាក្រុង បានដាក់ឱសានវាទដល់ក្រុមហេសប៊ូឡា (Hezbollah) ឲ្យ​បញ្ឈប់ការវាយប្រហារទាំងអស់ប្រឆាំងនឹងអ៊ីស្រាអែល និងតំបន់ទាំងមូលជាបន្ទាន់ ដោយលោកព្រមានថា សកម្មភាពទាំងនេះកំពុងធ្វើ​ឲ្យ​ស្ថិរភាពតំបន់ធ្លាក់ក្នុងគ្រោះថ្នាក់បំផុត។

ទន្ទឹមនឹងនេះដែរ លោកប្រធានាធិបតីបារាំង ក៏បានទទូចសុំ​ឲ្យ​នាយករដ្ឋមន្ត្រី ណេតាន់យ៉ាហ៊ូ គោរពនូវបូរណភាពទឹកដីរបស់ប្រទេសលីបង់ ហើយត្រូវចៀសវាងការបើកប្រតិបត្តិការវាយលុកតាមជើងគោកផងដែរ។

ចំណុចស្នូលនៃកិច្ចពិភាក្សានេះ គឺផ្តោតសំខាន់លើការត្រឡប់ទៅរកកិច្ចព្រមព្រៀងឈប់បាញ់ និងការដោះស្រាយវិបត្តិមនុស្សធម៌ដែលកំពុងរីករាលដាលនៅភាគខាងត្បូងប្រទេសលីបង់។ លោកម៉ាក្រុង បានសន្យាថា ប្រទេសបារាំងនឹងចាត់វិធានការបន្ទាន់បំផុត ដើម្បីជួយដល់ប្រជាជនលីបង់ដែលកំពុងភៀសខ្លួនចេញពីផ្ទះសម្បែង និងបានបញ្ជាក់សាជាថ្មីនូវការគាំទ្ររបស់បារាំងចំពោះកងកម្លាំងប្រដាប់អាវុធលីបង់ ក្នុងការទប់ទល់នឹងការគំរាមកំហែងពីក្រុមហេសប៊ូឡា។ លោកបានបញ្ជាក់យ៉ាងច្បាស់ថា ការឈរនៅខាងប្រជាជនលីបង់ គឺជាអាទិភាពចម្បងបំផុតនៃសកម្មភាពការទូតរបស់បារាំងនៅពេលនេះ៕

ប្រែសម្រួល៖ ឈាង