ព័ត៌មានអន្ដរជាតិ

ការចំណាយខ្ពស់របស់អាមេរិកលើសង្រ្គាមអ៊ីរ៉ង់ ធ្វើឲ្យរដ្ឋបាល ត្រាំ ធ្លាក់ចុះប្រជាប្រិយភាពខ្លាំង

បានផុស

៤ ខែ មុន

នៅ

ថ្ងៃអង្គារ ១០ មីនា ២០២៦

ដោយ

ខណៈសង្គ្រាមរវាងសហរដ្ឋអាមេរិក និងអ៊ីស្រាអែលវាយប្រហារលើអ៊ីរ៉ង់នៅតែបន្តកើនឡើងខ្លាំងនៅឡើយ សំណួរជាច្រើនតែងតែលើកឡើងថា តើទីក្រុងវ៉ាស៊ីនតោនខាតបង់ប៉ុន្មានក្នុងសង្គ្រាមនេះ?

យោងតាម Al Jazeera ចុះផ្សាយថ្ងៃទី៩ខែមីនា ឆ្នាំ២០២៦, នៅចុងសប្តាហ៍មុន ប្រភពពីរពីសភាបានប្រាប់អ្នកផ្សាយព័ត៌មានអាមេរិក MS NOW ថា សង្គ្រាមនេះកំពុងធ្វើឱ្យសហរដ្ឋអាមេរិកខាតបង់ប្រមាណ ១ប៊ីលានដុល្លារក្នុងមួយថ្ងៃ។

យន្តហោះចម្បាំងពីរគ្រឿងរបស់ទីក្រុងវ៉ាស៊ីនតោន។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយថ្ងៃក្រោយមកសារព័ត៌មាន Politico រាយការណ៍ថា បក្សសាធារណរដ្ឋអាមេរិកជាមួយសភាអាមេរិក Capitol Hill ភ័យខ្លាចថា មន្ទីរបញ្ចកោណ (Pentagon) កំពុងចាយលុយជិត ២ប៊ីលានដុល្លារក្នុងមួយថ្ងៃលើសង្គ្រាមជាមួយអ៊ីរ៉ង់។

លោក Hakeem Jeffries អ្នកតំណាងរាស្ត្រក្នុងសភា ប្រាប់អ្នកយកព័ត៌មាននៅក្នុងសន្និសីទសារព័ត៌មានមួយនៅសភា Capitol Hill កាលពីសប្តាហ៍មុនថា៖ « ប្រធានាធិបតី ដូណាល់ ត្រាំ កំពុងធ្វើឱ្យអាមេរិកធ្លាក់ចូលទៅក្នុងជម្លោះគ្មានទីបញ្ចប់មួយទៀតនៅមជ្ឈិមបូព៌ា និងចំណាយប្រាក់រាប់ពាន់លានដុល្លារ ដើម្បីទម្លាក់គ្រាប់បែកលើប្រទេសអ៊ីរ៉ង់»។

លោកបន្តថា៖ «ប៉ុន្តែពួកគេ(រដ្ឋបាលលោកត្រាំ) មិនអាចរកប្រាក់មួយកាក់មួយសេន ដើម្បីឱ្យប្រជាជនអាមេរិកទទួលបានតម្លៃសមរម្យ ទៅជួបគ្រូពេទ្យនៅពេលដែលពួកគេត្រូវការទេ។ មិនអាចរកប្រាក់មួយកាក់មួយសេន ដើម្បីធ្វើឱ្យវាកាន់តែងាយស្រួលសម្រាប់ជនជាតិអាមេរិក [….] ហើយពួកគេក៏មិនអាចរកប្រាក់មួយកាក់មួយសេន ដើម្បីបន្ថយការចំណាយលើគ្រឿងបរិភោគរបស់ប្រជាជនអាមេរិកដែរ»។

លោក ដូណាល់ ត្រាំ ឈ្នះការបោះឆ្នោតជាប្រធានាធិបតីឆ្នាំ ២០២៤ ដោយសារការសន្យាថា នឹងបញ្ចប់សង្គ្រាមនៅអ៊ុយក្រែននិងនៅលើពិភពលោក នាំសន្តិភាព កាត់បន្ថយការចំណាយលើការរស់នៅ តែក្រោយៗមកក៏មិនទាន់ឃើញការតបស្នងណាមួយឡើយដល់ប្រជាជនអាមេរិកដែលបោះឆ្នោតឲ្យលោក។

ការស្ទង់មតិរបស់ Reuters/Ipsos ធ្វើឡើងប៉ុន្មានម៉ោង បន្ទាប់ពីសហរដ្ឋអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់នៅថ្ងៃទី២៨ ខែកុម្ភៈដែលបង្កឱ្យមានការសងសឹកទូទាំងតំបន់ បានបង្ហាញថា កិច្ចខិតខំប្រឹងប្រែងធ្វើសង្គ្រាមនេះមានការគាំទ្រពីសាធារណជនអាមេរិកតិចតួចណាស់ ហើយតួលេខស្ទង់មតិគឺអាប់អួរសម្រាប់រដ្ឋបាលរបស់ប្រធានាធិបតី ត្រាំ ។ វាគូសបញ្ជាក់ថាសង្គ្រាមនេះមិនមានប្រជាប្រិយភាពក្នុងស្រុកទេ។

យ៉ាងណាក៏ដោយ មន្ទីរបញ្ចកោណ ជាទីស្នាក់ការកណ្តាលនៃក្រសួងការពារជាតិសហរដ្ឋអាមេរិក មិនទាន់បានចេញផ្សាយការប៉ាន់ស្មានជាផ្លូវការពីការចំណាយលើសង្គ្រាមនៅឡើយទេ៕

ប្រែសម្រួល៖ ណឺ មិនា