ព័ត៌មានអន្ដរជាតិ

បេសកជនពិសេសចិនទៅមជ្ឈិមបូព៌ា ជំរុញឱ្យបញ្ឈប់់ប្រតិបត្តិការយោធា

បានផុស

៤ ខែ មុន

នៅ

ថ្ងៃអង្គារ ១០ មីនា ២០២៦

ដោយ

បេសកជនពិសេសរបស់ប្រទេសចិន លោក Zhai Jun បានចួបជាមួយរដ្ឋមន្ត្រីការបរទេសអារ៉ាប៊ីសាអូឌីត លោក Faisal bin Farhan Al Saud ក្នុងប្រទេសអារ៉ាប៊ីសាអូឌីតកាលពីថ្ងៃអាទិត្យ ដោយនិយាយថា ប្រទេសចិនជំរុញឱ្យគ្រប់ភាគីទាំងអស់បញ្ឈប់ប្រតិបត្តិការយោធានេះជាបន្ទាន់ ទប់ស្កាត់ការកើនឡើងនៃភាពតានតឹងបន្ថែមទៀត និងជៀសវាងការបង្កគ្រោះថ្នាក់កាន់តែធ្ងន់ធ្ងរដល់ប្រជាជនក្នុងប្រទេសនៅតាមតំបន់នានា។

យោងតាម Global Times ផ្សាយថ្ងៃទី៩ ខែមីនា ឆ្នាំ២០២៦ , លោក Zhai ក៏បានជួបជាមួយ លោក Jassim Mohammed Al-Budaiwi អគ្គលេខាធិការនៃក្រុមប្រឹក្សាសហប្រតិបត្តិការសម្រាប់រដ្ឋអារ៉ាប់នៃឈូងសមុទ្រ (GCC) នៅទីក្រុងរីយ៉ាដនៅថ្ងៃដដែលនោះផងដែរ។

លោក Zhai Jun និង លោក Jassim Mohammed Al-Budaiwi។ រូបភាព៖ Arab News

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Faisal និយាយថា ស្ថានភាពនៅមជ្ឈិមបូព៌ាកំពុងប្រទះវិបត្តិដែលមិនធ្លាប់មានពីមុនមក ដោយអណ្តាតភ្លើងនៃសង្គ្រាមបានរីករាលដាលដល់ប្រទេសឈូងសមុទ្រ។

មិនតែប៉ុណ្ណោះប្រទេសអារ៉ាប៊ីសាអូឌីត ក៏ទទួលការគំរាមកំហែងយ៉ាងធ្ងន់ធ្ងរដល់ស្ថិរភាពក្នុងតំបន់ និងប៉ះពាល់ដល់ការផ្គត់ផ្គង់ថាមពលសកល និងសន្តិសុខដែនសមុទ្រផងដែរ។

ភាគីអារ៉ាប៊ីសាអូឌីតនិងក្រុមប្រឹក្សាសហប្រតិបត្តិការសម្រាប់រដ្ឋអារ៉ាប់នៃឈូងសមុទ្រ (GCC) កោតសរសើរចំពោះការប្តេជ្ញាចិត្តជាប់លាប់របស់ប្រទេសចិនចំពោះការស្វែងរកយុត្តិធម៌ និងសង្ឃឹមថាប្រទេសចិននឹងបន្តដើរតួនាទីយ៉ាងសកម្មក្នុងការលើកកម្ពស់បទឈប់បាញ់ និងបញ្ចប់អរិភាព ដើម្បីការពារការធ្លាក់ចុះបន្ថែមទៀតនៃស្ថានភាពក្នុងតំបន់។

មិនតែប៉ុណ្ណោះ បេសកជនពិសេសប្រទេសចិន លោក Zhai បានកត់សម្គាល់ថាក្នុងនាមជាប្រទេសធំមួយប្តេជ្ញាចិត្តចំពោះរកភាពយុត្តិធម៌ និងជាមិត្តល្អ ជាពិសេសដៃគូរបស់អារ៉ាប៊ីសាអូឌីត។

ប្រទេសចិននឹងបន្តដើរតួនាទីស្ថាបនា ហើយត្រៀមខ្លួនរួចជាស្រេចដើម្បីធ្វើការជាមួយអារ៉ាប៊ីសាអូឌីត ដើម្បីចូលរួមជាមួយគ្រប់ភាគីទាំងអស់ និងខិតខំប្រឹងប្រែងឥតឈប់ឈរ ការពារសន្តិភាព និងស្ថិរភាពនៅក្នុងតំបន់ឈូងសមុទ្រ។

គោលការណ៍នៃការបន្ធូរបន្ថយភាពតានតឹងត្រូវបានបន្ទរ នៅពេលដែលលោក Zhai បានជួបជាមួយលោក Al-Budaiwi។

លោក Zhai ថា៖ « ស្ថានភាពក្នុងតំបន់បច្ចុប្បន្នមានភាពស្មុគស្មាញ និងរសើបខ្លាំង ប្រទេសចិនជំរុញឱ្យគ្រប់ភាគីទាំងអស់បញ្ឈប់ការបាញ់ប្រហារជាបន្ទាន់ ទប់ស្កាត់ការកើនឡើងនៃភាពតានតឹងបន្ថែមទៀត និងវិលត្រឡប់ទៅរកផ្លូវនៃការចរចាឱ្យបានឆាប់តាមដែលអាចធ្វើទៅបាន»។

លោក Al-Budaiwi និយាយថា ការកើនឡើងនៃភាពតានតឹងនៅក្នុងតំបន់ឈូងសមុទ្រគំរាមកំហែងយ៉ាងធ្ងន់ធ្ងរដល់សន្តិសុខ និងស្ថិរភាពពិភពលោក ហើយមិនបម្រើផលប្រយោជន៍របស់ភាគីណាមួយឡើយ៕

ប្រែសម្រួល៖ ណឺ មិនា