ព័ត៌មានអន្ដរជាតិ

ត្រាំហៅសមាជិកណាតូទាំងអស់ ថា «កំសាក» ក្រោយមិនគាំទ្រអាមេរិកក្នុងច្រក Hormuz

បានផុស

៤ ខែ មុន

នៅ

ថ្ងៃសៅរ៍ ២១ មីនា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានរិះគន់សម្ព័ន្ធមិត្តណាតូ ជុំវិញការខ្វះការគាំទ្រសម្រាប់សង្គ្រាមអាមេរិកនិងអ៊ីស្រាអែលលើអ៊ីរ៉ង់ ខណៈច្រកសមុទ្រ Hormuz នៅតែបន្តបិទ ហើយជម្លោះក្នុងមជ្ឈិមបូព៌ាកាន់តែរីករាលដាលខ្លាំងឡើង។ នេះបើយោងតាម Al Jazeera ផ្សាយថ្ងៃទី២០ ខែមីនា ឆ្នាំ ២០២៦ ។

លោក ត្រាំ បង្ហោះបើបណ្តាញសង្គម Truth Social នៅថ្ងៃសុក្រថា៖«ប្រទេសសមាជិកណាតូគឺកំសាក ហើយយើងនឹងចងចាំទុក»។

ប្រធានាធិបតីអាមេរិក លោក ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអាមេរិកបានត្អូញត្អែរថា៖ « ប្រទេសដែលជាសមាជិកណាតូមិនចង់ចូលរួមជាមួយសង្រ្គាមនៅអ៊ីរ៉ង់ទេ ប៉ុន្តែនៅតែត្អូញពីតម្លៃប្រេងឡើងថ្លៃ»។

លោកសរសេរថា៖ «ឥឡូវនេះយោធាយើងឈ្នះការប្រយុទ្ធជាមួយនឹងគ្រោះថ្នាក់តិចតួចបំផុត។ ពួកគេ (ណាតូ) នៅតែត្អូញត្អែរពីតម្លៃប្រេងឡើងខ្ពស់តម្រូវឱ្យពួកគេបង់ប្រាក់ច្រើន ប៉ុន្តែមិនចង់ជួយបើកច្រកសមុទ្រ Hormuz ជាសមយុទ្ធយោធាសាមញ្ញសោះ ហើយវាជាហេតុផលតែមួយគត់សម្រាប់តម្លៃប្រេងឡើងខ្ពស់។ គ្រាន់តែរឿងងាយស្រួលសម្រាប់ពួកគេ ហើយវាមានហានិភ័យតិចតួចប៉ុណ្ណោះ» ។

គួរបញ្ជាក់ថា លោក ត្រាំ បានអំពាវនាវឱ្យសម្ព័ន្ធមិត្តសំខាន់ៗរបស់សហរដ្ឋអាមេរិកនិងប្រទេសដទៃទៀត តែគ្មាននរណាម្នាក់ក្នុងចំណោមពួកគេពិគ្រោះយោបល់ ឬផ្តល់ដំបូន្មានលើសង្គ្រាម ដើម្បីជួយធានាសុវត្ថិភាពនៃការដឹកជញ្ជូនប្រេងឆ្លងកាត់ច្រកសមុទ្រ Hormuz ដែលគ្រប់គ្រងដោយអ៊ីរ៉ង់នោះទេ។

ជម្លោះនេះបានធ្វើឱ្យទីផ្សារពិភពលោករង្គោះរង្គើ សម្លាប់មនុស្សរាប់ពាន់នាក់ ហើយមនុស្សរាប់លាននាក់ត្រូវផ្លាស់ទីលំនៅចាប់តាំងពីការវាយប្រហាររវាងសហរដ្ឋអាមេរិក និងអ៊ីស្រាអែលបានចាប់ផ្តើមនៅថ្ងៃទី ២៨ ខែកុម្ភៈ៕

ប្រែសម្រួល៖ ណឺ មិនា