ព័ត៌មានអន្ដរជាតិ

មន្ត្រីជាន់ខ្ពស់គុយបា ថា មិនខ្លាចការវាយប្រហាររបស់អាមេរិកទេ

បានផុស

៤ ខែ មុន

នៅ

ថ្ងៃអង្គារ ២៤ មីនា ២០២៦

ដោយ

មន្ត្រីជាន់ខ្ពស់រដ្ឋាភិបាលគុយបា អះអាងថា ប្រទេសដែនកោះជិតអាមេរិកបំផុតនេះ បានត្រៀមខ្លួនរួចរាល់ក្នុងការប្រឈមជាមួយសហរដ្ឋអាមេរិកដែលអាចបើកការវាយប្រហារនានារបស់ទីក្រុងវ៉ាស៊ីនតោនលើគុយបា ខណៈប្រទេសកោះនេះចាប់ផ្តើមរងការដាច់ចរន្តអគ្គិសនីយ៉ាងធ្ងន់ធ្ងរក្រោមការបិទផ្លូវប្រេងរបស់រដ្ឋបាលត្រាំ និងរុញច្រានសេដ្ឋកិច្ចឱ្យធ្លាក់ចុះយ៉ាងខ្លាំង។

អនុរដ្ឋមន្ត្រីការបរទេស លោក Carlos Fernandez de Cossio កាលពីពេលថ្មីៗនេះ បានឆ្លើយតបចំពើការសាកសួររបស់អ្នកព័ត៌មាន ចំពោះការគំរាមកំហែងរបស់ប្រធានាធិបតីអាមេរិកលោក ដូណាល់ ត្រាំ ដែលបង្ហាញពីបំណងចង់គ្រប់គ្រងប្រទេសគុយបា។

លោក Carlos Fernandez de Cossio ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុរដ្ឋមន្រ្តីឆ្លើយថា៖ «យើងត្រៀមខ្លួនរួចហើយ សម្រាប់ការឈ្លានពានដោយយោធារបស់អាមេរិក»។

លោក de Cossio ប្រាប់កម្មវិធី Meet the Press របស់សារព័ត៌មាន NBC ថា៖ «យើងមិនជឿថា វាជាអ្វីដែលអាចទៅរួចនោះទេ ប៉ុន្តែយើងនឹងក្លាយជាមនុស្សឆោតល្ងង់ ប្រសិនបើយើងមិនរៀបចំទុកមុន»។

ការអត្ថាធិប្បាយរបស់លោកបានចាក់ផ្សាយមួយថ្ងៃ បន្ទាប់ពីការដួលរលំចុងក្រោយនៃបណ្តាញអគ្គិសនីទូទាំងប្រទេស ធ្វើឱ្យមនុស្សរាប់លាននាក់ស្ថិតក្នុងភាពងងឹត។

មិនតែប៉ុណ្ណោះ ការដាច់ចរន្តអគ្គិសនីនៅថ្ងៃសៅរ៍ គឺជាលើកទីពីរក្នុងសប្តាហ៍មុន និងលើកទីបីក្នុងខែមីនា។

ក្រសួងថាមពល និងរ៉ែ ដែលគ្រប់គ្រងអគ្គិសនីរដ្ឋ បានឱ្យដឹងថា មនុស្សប្រហែល៧២ ០០០នាក់ ក្នុងរដ្ឋធានីហាវ៉ាណា រួមទាំងមន្ទីរពេទ្យចំនួន៥ មានអគ្គិសនីប្រើប្រាស់ម្តងទៀតកាលព្រឹកថ្ងៃអាទិត្យ។ ប៉ុន្តែចំនួននេះមានភាពត្រឹមតែមួយភាគតូចនៃចំនួនប្រជាជនសរុប របស់ហាវ៉ាណាប្រហែលពីរលាននាក់ប៉ុណ្ណោះ។

លោក ត្រាំ បានដាក់បទបញ្ជាហាមឃាត់ការនាំចូលប្រេងឥន្ធនៈទៅដល់កោះនេះ បន្ទាប់ពីចាប់ខ្លួនសម្ព័ន្ធមិត្តរបស់ប្រទេសគុយបា គឺប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) នៅដើមឆ្នាំនេះ ព្រមទាំងព្រមានដល់ក្រុមហ៊ុននាំចេញប្រេងនានាថា អាចប្រឈមមុខនឹងពន្ធគយខ្ពស់៕

ប្រែសម្រួល៖ ណឺ មិនា