ព័ត៌មានអន្ដរជាតិ

UNHCR ៖ ពលរដ្ឋអ៊ីរ៉ង់ជាង ៣,២លាននាក់ត្រូវភៀសខ្លួនក្នុងប្រទេស

បានផុស

២ ខែ មុន

នៅ

ថ្ងៃសុក្រ ២៧ មីនា ២០២៦

ដោយ

សង្គ្រាមដែលបង្កឡើងដោយសហរដ្ឋអាមេរិកនិងអ៊ីស្រាអែលបានសម្លាប់មនុស្សជាង ១៥០០នាក់នៅក្នុងប្រទេសអ៊ីរ៉ង់។ ការបំផ្លិចបំផ្លាញនៃសង្គ្រាមបានបង្កឱ្យមានការផ្លាស់ទីលំនៅយ៉ាងច្រើននៅក្នុងប្រទេសអ៊ីរ៉ង់ចាប់តាំងពីផ្ទុះសង្គ្រាមកាលពីថ្ងៃទី២៨ខែកុម្ភៈ។

យោងតាម Al Jazeera ផ្សាយថ្ងៃទី២៦ខែមីនា ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) បានប៉ាន់ប្រមាណថា មនុស្សប្រមាណ ៣.២លាននាក់ ឬច្រើនជាង ៣ភាគរយនៃចំនួនប្រជាជនអ៊ីរ៉ង់ ត្រូវបានផ្លាស់ទីលំនៅក្នុងប្រទេសអ៊ីរ៉ង់ចាប់តាំងពីការវាយប្រហាររបស់សហរដ្ឋអាមេរិក-អ៊ីស្រាអែល។

ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន លោក Filippo Grandi ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មកទល់ថ្ងៃនេះ វាមានរយៈពេល២៧ថ្ងៃហើយនៃជម្លោះនៅអ៊ីរ៉ង ទីភ្នាក់ងារជំនួយ និងប្រទេសដែលមានព្រំប្រទល់ជាប់នឹងប្រទេសអ៊ីរ៉ង់កំពុងត្រៀមខ្លួនសម្រាប់វិបត្តិជនភៀសសឹកដែលអាចកើតមាន ខណៈជនស៊ីវិលចាប់ផ្តើមរត់គេចពីកន្លែងគ្រោះថ្នាក់។

នៅក្នុងប្រទេសអ៊ីរ៉ង់ ប្រជាជនត្រូវបង្ខំឱ្យចាកចេញពីផ្ទះសម្បែងរបស់ពួកគេ ហើយមន្ទីរពេទ្យជាច្រើន កន្លែងផលិតនុយក្លេអ៊ែរ រោងចក្រចម្រាញ់ប្រេង រោងចក្រទឹកស្អាត ត្រូវរងការវាយប្រហារ។

យ៉ាងណា សម្ពាធនៅសមរភូមិក្នុងប្រទេសអ៊ីរ៉ង់កំពុងកើនឡើង ខណៈទីតាំងស៊ីវិលជាង ៨៥ ១៧៦កន្លែងត្រូវខូចខាតចាប់តាំងពីសង្គ្រាមបានចាប់ផ្តើម រួមទាំងមណ្ឌលថែទាំសុខភាពចំនួន ២៨២ សាលារៀនចំនួន ៦០០ និងផ្ទះចំនួន ៦៤ ៥៨៣ ខ្នង។

ចំណែកនៅក្នុងទីក្រុងតេហេរ៉ង់តែមួយ រដ្ឋបាលទីក្រុងលើកឡើងទៅកាន់ប្រព័ន្ធផ្សព្វផ្សាយក្នុងស្រុកថា លំនៅឋានជិត ១៤ ០០០ ក្នុងរដ្ឋធានីត្រូវបានខូចខាត ហើយយ៉ាងហោចណាស់មនុស្ស ៦ ០០០ នាក់ត្រូវជម្លៀសពីផ្ទះរបស់ពួកគេ។

គួរបញ្ជាក់ថា ហានិភ័យនៃប្រទេសអ៊ីរ៉ង់កើតឡើងកាន់តែខ្លាំង ដែលរំខានដល់សេវាកម្មសំខាន់ៗ ជំរុញឱ្យមានភាពស្មុគស្មាញ៕

ប្រែសម្រួល៖ ណឺ មិនា