ត្រាំ៖ ព្រោះ​​ប្រទេស​មួយបញ្ចុះបញ្ចូល ទើប​អ៊ីរ៉ង់ព្រមចូលតុចរចាជាមួយអាមេរិក

រឿងរ៉ាវដែលពិភពលោកកំពុងងឿងឆ្ងល់ថា ហេតុអ្វីបានជាអ៊ីរ៉ង់សុខចិត្តព្រមផ្អាកបាញ់នៅនាទីចុងក្រោយ ពេលនេះត្រូវបានលាតត្រដាងហើយ។ លោកប្រធានាធិបតី ដូណាល់ ត្រាំ បានបង្ហើប​ឲ្យ​ដឹងថា លោកជឿជាក់យ៉ាងច្បាស់ថា ប្រទេសចិនគឺជាអ្នកនៅពីក្រោយការបញ្ចុះបញ្ចូល​​ឲ្យ​អ៊ីរ៉ង់ព្រមចូលតុចរចា បន្ទាប់ពីលោកបានប្រកាសផ្អាកការទម្លាក់គ្រាប់បែករយៈពេលពីរសប្តាហ៍ ជាថ្នូរនឹងការបើកច្រកសមុទ្រ Hormuz ឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម Times of Israel ចុះ​ផ្សាយ​ថ្ងៃ​ពុធទី​៨ខែមេសាឆ្នាំ​២០២៦ អន្តរាគមន៍ពីសំណាក់ទីក្រុងប៉េកាំងនេះ បានកើតឡើងតែមួយប៉ព្រិចភ្នែកប៉ុណ្ណោះ មុនពេលឱសានវាទដែលលោកត្រាំ គ្រោងនឹងកម្ទេចហេដ្ឋារចនាសម្ព័ន្ធសំខាន់ៗរបស់អ៊ីរ៉ង់ត្រូវឈានចូលមកដល់។

ប្រភពព័ត៌មានពីមន្ត្រីអ៊ីរ៉ង់ បាន​ឲ្យ​ដឹង​ថា ចិនបានស្នើសុំឲ្យ​អ៊ីរ៉ង់ «បង្ហាញភាពទន់ភ្លន់ និងកាត់បន្ថយភាពតានតឹង» ដោយសារតែចិនបារម្ភពីវិបត្តិសេដ្ឋកិច្ចសកល។ បទឈប់បាញ់នេះត្រូវបានអនុម័តដោយមេដឹកនាំកំពូលថ្មីរបស់អ៊ីរ៉ង់ គឺលោក Mojtaba Khamenei ដែលលេចឮ​ដំណឹងថា លោកបានរងរបួសតាំងពីដើមសង្គ្រាមមកម្ល៉េះ ហើយក៏មិនទាន់បង្ហាញមុខជាសាធារណៈនៅឡើយដែរ ចាប់តាំងពីលោកឡើងមកបន្តតំណែងជំនួសឪពុកដែលត្រូវបានសម្លាប់ក្នុងការវាយប្រហារលើកដំបូង។

ចិនមានហេតុផលសមរម្យក្នុងការចេញមុខអន្តរាគមន៍បែបនេះ ព្រោះខ្លួនគឺជាអ្នកទិញប្រេងដ៏ធំបំផុតពីអ៊ីរ៉ង់ ដែលប្រេងទាំងនោះត្រូវដឹកឆ្លងកាត់ច្រកសមុទ្រ Hormuz។ លើសពីនេះ ចិនក៏មានទំនាក់ទំនងសេដ្ឋកិច្ចយ៉ាងស្អិតល្មួតជាមួយបណ្តាប្រទេសនៅតំបន់ឈូងសមុទ្រពែរ្សផងដែរ ដូច្នេះការដែលអ៊ីរ៉ង់វាយប្រហារ និងបិទផ្លូវទឹកដ៏សំខាន់នេះ បានធ្វើឲ្យ​ចិនខាតបង់ប្រយោជន៍យ៉ាងធំធេង។ បន្ទាប់ពីស្ថានភាពធូរស្រាលបន្តិច លោកត្រាំ ក៏គ្រោងនឹងធ្វើដំណើរទៅជួបលោក ស៊ី ជិនពីង នៅពាក់កណ្តាលខែឧសភាខាងមុខ ដើម្បីជជែកពីបញ្ហាមហាអំណាចទាំងពីរនេះវិញ។

គួររំឭកផងដែរថា សង្គ្រាមដ៏សាហាវនេះបានធ្វើ​ឲ្យ​តម្លៃថាមពលទូទាំងពិភពលោកហក់ឡើងខ្ពស់កប់ពពក បន្ទាប់ពី​ចរាចរណ៍តាមច្រកសមុទ្រ Hormuz បានធ្លាក់ចុះរហូតដល់​៩០% ដោយសារការបិទផ្លូវទឹក និងការវាយប្រហារគ្នា។ លោកត្រាំ ធ្លាប់បានព្រមានយ៉ាងចាស់ដៃថា បើអ៊ីរ៉ង់មិនព្រមបើកផ្លូវទឹកទេ លោកនឹងកម្ទេចស្ពាន និងរោងចក្រអគ្គិសនីឲ្យ​ខ្ទេច ដោយលោកប្រើសម្តីធ្ងន់ៗថា «អារ្យធម៌មួយនឹងត្រូវរលាយបាត់បង់នៅយប់នេះ»។ ប៉ុន្តែជាសំណាងល្អ ដោយសារតែមានការសម្របសម្រួលពីប៉ាគីស្ថាន និងការដាក់សម្ពាធពីចិន ទើបសង្គ្រាមដ៏ធំមួយត្រូវបានផ្អាកជាបណ្តោះអាសន្ននៅនាទីចុងក្រោយបែបនេះ៕

ប្រែសម្រួល៖ ឈាង