ព័ត៌មានអន្ដរជាតិ

អ៊ីរ៉ង់ ដំឡើងសំឡេងទាមទារដាច់ខាតរឿងពីរ គឺ លើកលែងការបង្កកទ្រព្យ និងបទឈប់បាញ់នៅលីបង់

បានផុស

៣ ខែ មុន

នៅ

ថ្ងៃសៅរ៍ ១១ មេសា ២០២៦

ដោយ

ប្រធានសភាអ៊ីរ៉ង់ លោក Mohammad Bagher Qalibaf លើកឡើងកាលពីថ្ងៃសុក្រថានឹងគ្មានកិច្ចចរចាជាមួយសហរដ្ឋអាមេរិកទេ បើគ្មានបទឈប់បាញ់នៅលីបង់ និងការលើកលែងទណ្ឌកម្មលើទ្រព្យសម្បត្តិអ៊ីរ៉ង់ដែលអាមេរិកនិងអន្តរជាតិបង្កកនៅបរទេស ដើម្បីអនុញ្ញាតឱ្យអ៊ីរ៉ង់ប្រើប្រាស់ម្តងទៀត។ នេះបើយោងតាមសារព័ត៌មានអាមេរិក The Hill ។

លោក Qalibaf សរសេរលើបណ្តាញសង្គម X ថា៖ « វិធានការពីរដែលបានព្រមព្រៀងគ្នារវាងភាគីទាំងពីរមិនទាន់ត្រូវបានអនុវត្តនៅឡើយទេ។ បញ្ហាទាំងពីរនេះត្រូវតែបំពេញមុនពេលការចរចាចាប់ផ្តើម»។

ប្រធានសភាអ៊ីរ៉ង់ លោក Mohammad Bagher Qalibaf ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទឈប់បាញ់ដ៏ផុយស្រួយរវាងសហរដ្ឋអាមេរិកនិងអ៊ីរ៉ង់ ត្រូវបានធ្វើឡើងនៅថ្ងៃអង្គារ ដោយផ្អាកសកម្មភាពយោធាទាំងអស់ចាប់តាំងពីថ្ងៃចាប់ផ្តើមសង្រ្គាមរបស់សហរដ្ឋអាមេរិកនិងអ៊ីស្រាអែរួមគ្នានៅថ្ងៃទី២៨ ខែកុម្ភៈ។ បន្ទាប់មកអ៊ីរ៉ង់បានបិទច្រកសមុទ្រហ័រមូស(Hormuz) និងសងសឹកសម្ព័ន្ធមិត្តអាមេរិកនៅទូទាំងឈូងសមុទ្រពែរ្ស។

ទាំងសហរដ្ឋអាមេរិកនិងអ៊ីរ៉ង់ចោទប្រកាន់គ្នាទៅវិញទៅមកថាមិនគោរពតាមកិច្ចព្រមព្រៀងឈប់បាញ់។

រដ្ឋបាល លោក ដូណាល់ ត្រាំបានបដិសេធពីការអះអាងរបស់អ៊ីរ៉ង់ថាកិច្ចព្រមព្រៀងនេះអនុវត្តចំពោះប្រទេសលីបង់ ជាកន្លែងដែលអ៊ីស្រាអែលធ្វើការវាយប្រហារជាច្រើនលើកច្រើនសារលើក្រុមហេសបូឡា។

លោក Qalibaf ធ្លាប់បានចោទប្រកាន់សហរដ្ឋអាមេរិកថារំលោភលើប្រការបីចំណុចនៃសំណើទាំង១០ របស់អ៊ីរ៉ង់។ មួយក្នុងចំណោមនោះរួមមានការវាយប្រហារលើប្រទេសលីបង់។ ពីរផ្សេងទៀតរួមមានដ្រូនរបស់អាមេរិកហោះរំលោភលើដែនអាកាសអ៊ីរ៉ង់និងការប៉ុនប៉ងរារាំងអ៊ីរ៉ង់ពីការបង្កើនសារធាតុអ៊ុយរ៉ាញ៉ូម។

លោក Qalibaf សរសេរលើបណ្តាញសង្គម X កាលពីថ្ងៃពុធថា៖ « ឥឡូវនេះ មូលដ្ឋានដែលអាចអនុវត្តសម្រាប់ការចរចាត្រូវបានរំលោភបំពានដោយបើកចំហនិងច្បាស់ៗ សូម្បីតែមុនពេលការចរចាចាប់ផ្តើមក៏ដោយ។ ក្នុងស្ថានភាពបែបនេះ បទឈប់បាញ់ទ្វេភាគីឬការចរចាគឺមិនសមហេតុផលទេ»។

ការលើកឡើងរបស់លោកជាការឆ្លើយតបទៅអ្នកនាំពាក្យសេតវិមាន លោកស្រី Karoline Leavitt និយាយពីផែនការ ១០ ចំណុចកាលពីថ្ងៃអង្គារ៕

ប្រែសម្រួល៖ ណឺ មិនា