ព័ត៌មានអន្ដរជាតិ

មុនការចរចាជាមួយអ៊ីរ៉ង់ លោក JD Vance ព្រមានថា «កុំលេងសើចជាមួយអាមេរិកឱ្យសោះ»

បានផុស

៣ ខែ មុន

នៅ

ថ្ងៃសៅរ៍ ១១ មេសា ២០២៦

ដោយ

មុនការចរចាសន្តិភាពជាមួយអ៊ីរ៉ង់នៅប្រទេសប់ាគីស្ថាន អនុប្រធានាធិបតីសហរដ្ឋអាមេរិក លោក JD Vance ដែលដឹកនាំគណៈប្រតិភូអាមេរិក បានព្រមានអ៊ីរ៉ង់កាលពីថ្ងៃសុក្រថា «កុំលេងសើចជាមួយសហរដ្ឋអាមេរិកឱ្យសោះ»។

យោងតាមភ្នាក់ងារសារព័ត៌មាន AP ផ្សាយថ្ងៃទី១១ ខែមេសា ឆ្នាំ២០២៦ លោក Vance ចេញដំណើរទៅប្រទេសប៉ាគីស្ថាននៅថ្ងៃសុក្រ ដើម្បីដឹកនាំការចរចាសម្របសម្រួលជាមួយអ៊ីរ៉ង់នៅក្នុងរដ្ឋធានីអ៊ីស្លាម៉ាបាដ។

អនុប្រធានាធិបតីសហរដ្ឋអាមេរិក លោក JD Vance ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Vance ប្រាប់អ្នកយកព័ត៌មានមុនពេលឡើងយន្តហោះ Air Force Two ដើម្បីធ្វើដំណើរទៅប្រទេសប៉ាគីស្ថានថា៖ « ប្រសិនបើអ៊ីរ៉ង់មានឆន្ទៈចរចាដោយស្មោះត្រង់ យើងពិតជាមានឆន្ទៈបើកផ្លូវឱ្យអ៊ីរ៉ង់។ ប៉ុន្តែប្រសិនបើពួកគេព្យាយាមលេងសើចជាមួយយើង នោះពួកគេនឹងឃើញថាក្រុមចរចាគឺមិនអាចទទួលយកបាននោះទេ»។

ដំណើរទស្សនកិច្ចរបស់ លោក Vance បានកើតឡើងនៅពេលដែលបទឈប់បាញ់បណ្ដោះអាសន្នដ៏ផុយស្រួយហាក់ដូចជាស្ថិតនៅលើច្រាំងនៃការដួលរលំ។

គួរបញ្ជាក់ថាគម្លាតរវាងការទាមទារជាសាធារណៈរបស់អ៊ីរ៉ង់និងការទាមទារពីសហរដ្ឋអាមេរិក-អ៊ីស្រាអែលហាក់ដូចមិនអាចផ្សះផ្សាគ្នាបានទេ។

អំឡុងពេល លោក Vance ធ្វើដំណើរទៅកាន់រដ្ឋធានីអ៊ីស្លាម៉ាបាដរបស់ប្រទេសប៉ាគីស្ថាន ប្រធានសភាអ៊ីរ៉ង់ លោក Mohammad Bagher Qalibaf បង្ហោះលើបណ្តាញសង្គមផ្ទាល់ខ្លួនថា៖ « បទឈប់បាញ់នៅក្នុងប្រទេសលីបង់ជាកន្លែងដែលអ៊ីស្រាអែលកំពុងកំណត់គោលដៅលើក្រុមសកម្មប្រយុទ្ធហេសបូឡា(Hezbollah) និងការដោះលែងទ្រព្យសម្បត្តិរបស់អ៊ីរ៉ង់ដែលត្រូវបានរារាំង ត្រូវតែបំពេញមុនកិច្ចចរចាចាប់ផ្តើម»៕

ប្រែសម្រួល៖ ណឺ មិនា