សេតវិមាន ប្រកាស​ថា​ចង់​បាន​ចម្លើយ​រួមគ្នា​មួយ ពី​ថ្នាក់ដឹកនាំ​អ៊ីរ៉ង់

កាលពីថ្ងៃពុធ​ទី​២២​ខែមេសា​ឆ្នាំ​២០២៦ អ្នកនាំពាក្យសេតវិមាន លោកស្រី Karoline Leavitt បានលើកឡើងថា លោកប្រធានាធិបតី ដូណាល់ ត្រាំ ចង់ឃើញការឆ្លើយតប​ដែលចេញពីស្មារតី «រួមគ្នាជាធ្លុងមួយ» ពីសំណាក់ថ្នាក់ដឹកនាំកំពូលៗរបស់អ៊ីរ៉ង់ ចំពោះសំណើផ្សេងៗដែលសហរដ្ឋអាមេរិកបានដាក់ជូន ដើម្បីបញ្ចប់អរិភាពរវាងប្រទេសទាំងពីរ។ នេះ​បើ​យោង​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន REUTERS។

ទាក់ទងនឹងការចរចានេះដែរ លោកស្រី Leavitt បានបញ្ជាក់ប្រាប់អ្នកសារព័ត៌មានថា រហូតមកដល់ពេលនេះ លោកត្រាំ មិនទាន់បានកំណត់កាលបរិច្ឆេទចុងក្រោយណាមួយ សម្រាប់ការបញ្ចប់ការបន្តបទឈប់បាញ់ ដែលលោកបានប្រកាសកាលពីថ្ងៃអង្គារនោះឡើយ។ នេះមានន័យថា ឱកាសនៃកិច្ចពិភាក្សានៅតែមាន ប៉ុន្តែអាមេរិកកំពុងរង់ចាំមើលជំហរពិតប្រាកដ និងការសម្រេចចិត្តដ៏ច្បាស់លាស់ពីខាងភាគីអ៊ីរ៉ង់ជាមុនសិន។

អ្វីដែលកាន់តែគួរឲ្យ​ចាប់អារម្មណ៍ជាងនេះទៅទៀតនោះ គឺលក្ខខណ្ឌដ៏តឹងរ៉ឹងដែលអាមេរិកបានដាក់លើតុចរចា។ នៅក្នុងបទសម្ភាសន៍មួយជាមួយកម្មវិធី «The Story with Martha MacCallum» របស់ទូរទស្សន៍ Fox News លោកស្រី Leavitt បានទម្លាយឲ្យ​ដឹងថា ជាផ្នែកមួយនៃកិច្ចព្រមព្រៀងដើម្បីបញ្ចប់សង្គ្រាម អ៊ីរ៉ង់ដាច់ខាតត្រូវតែយល់ព្រមប្រគល់សារធាតុអ៊ុយរ៉ាញ៉ូមដែលខ្លួនបានចម្រាញ់រួចទាំងអស់ មកឲ្យ​​អាមេរិកគ្រប់គ្រង។ លក្ខខណ្ឌនេះត្រូវបានគេមើលឃើញថា ជាចំណុចគន្លឹះដ៏សំខាន់បំផុតមួយ ដែលលោកត្រាំ ចង់ប្រើដើម្បីធានាថា អ៊ីរ៉ង់នឹងមិនអាចបន្តអភិវឌ្ឍអាវុធនុយក្លេអ៊ែរបានទៀតឡើយ នៅពេលដែលសន្តិភាពត្រូវបានបង្កើតឡើង៕

ប្រែសម្រួល៖ ឈាង