ចិន ដាក់ចេញនូវ «ខ្សែបន្ទាត់ក្រហម» ចំនួន​៤ ក្នុង​ជំនួប​ជាមួយ​លោក ត្រាំ នៅ​ប៉េកាំង

មុនពេលដំណើរទស្សនកិច្ចរបស់លោកប្រធានាធិបតី ដូណាល់ ត្រាំ ទៅដល់ទីក្រុងប៉េកាំង ប្រព័ន្ធផ្សព្វផ្សាយផ្លូវការរបស់រដ្ឋាភិបាលចិន បានចាប់ផ្តើមផ្សព្វផ្សាយនូវអត្ថបទវិភាគ និងមតិយោបល់ជាបន្តបន្ទាប់ ដែលឆ្លុះបញ្ចាំងពីក្តីសង្ឃឹមរបស់ថ្នាក់ដឹកនាំចិន ចំពោះកិច្ចប្រជុំកំពូលលើកនេះ។ តាមរយៈសារព័ត៌មានទាំងនោះ ចិនបានបង្ហាញពីជំហរច្បាស់លាស់ក្នុងការស្វែងរកការ «ចាប់ផ្តើមទំនាក់ទំនងឡើងវិញ» ជាមួយសហរដ្ឋអាមេរិក។

ទោះ​មានការអំពាវនាវឱ្យមានទំនាក់ទំនងល្អប្រសើរជាងមុន និងការសង្កត់ធ្ងន់លើផលប្រយោជន៍រួមនៃសេដ្ឋកិច្ចពិភពលោកក៏ដោយ ក៏ទីក្រុងប៉េកាំងនៅតែប្រកាន់ខ្ជាប់នូវគោលការណ៍គ្រឹះរបស់ខ្លួន ដោយបានដាស់តឿនជាថ្មីអំពី «ខ្សែបន្ទាត់ក្រហម» ចំនួន ៤ ដែលសហរដ្ឋអាមេរិកមិនត្រូវរំលងដាច់ខាត៖

១. បញ្ហាកោះតៃវ៉ាន់
២. បញ្ហាប្រជាធិបតេយ្យ និងសិទ្ធិមនុស្ស
៣. ប្រព័ន្ធនយោបាយរបស់ចិន
៤. សិទ្ធិក្នុងការអភិវឌ្ឍរបស់ចិន ដែលរួមទាំងការអភិវឌ្ឍផ្នែកបច្ចេកវិទ្យាផងដែរ។

ដ្បិត​មានដែនកំណត់ទាំងនេះ ក៏បរិយាកាសនៅក្នុងសារព័ត៌មានរដ្ឋចិន ហាក់មានភាពវិជ្ជមានគួរឱ្យកត់សម្គាល់។ ក្នុងអត្ថបទវិភាគមួយរបស់កាសែត People’s Daily ដែលជាកាសែតផ្លូវការរបស់បក្សកុម្មុយនិស្តចិន បានលើកឡើងថា «ទំនាក់ទំនងចិន-អាមេរិក ប្រហែលជាមិនអាចវិលត្រឡប់ទៅរកភាពដើមវិញបានទេ ប៉ុន្តែវាអាចបោះជំហានទៅរកអនាគតដ៏ប្រសើរជាងមុនបាន»។

ស្របពេលជាមួយគ្នានេះ ទីភ្នាក់ងារព័ត៌មាន Xinhua ក៏បានសង្កត់ធ្ងន់ទៅលើចំណងសេដ្ឋកិច្ចដ៏រឹងមាំ ដោយផ្សាយ​ថា មហាអំណាចសេដ្ឋកិច្ចទាំងពីរនេះ មានទំនាក់ទំនងគ្នាយ៉ាងជិតស្និទ្ធមិនអាចកាត់ផ្តាច់បាន ជាពិសេសគឺខ្សែសង្វាក់ផ្គត់ផ្គង់សកល ដែលកំពុងមានការរួមបញ្ចូលគ្នា។ សារទាំងនេះ បានបង្ហាញថា ថ្នាក់ដឹកនាំចិនកំពុងព្យាយាមស្វែងរកចំណុចរួមមួយ ដើម្បីជំរុញកិច្ចសហប្រតិបត្តិការសេដ្ឋកិច្ច ខណៈពេលដែលនៅតែរក្សាជំហររឹងមាំលើបញ្ហាអធិបតេយ្យភាពជាតិ៕

ប្រែសម្រួល៖ ឈាង