UN៖ ភាពអត់ឃ្លាន​​ធ្លាក់ចុះ​​ទូទាំងពិភពលោក ប៉ុន្តែ​ហានិភ័យ​អាកាសធាតុ និងពាណិជ្ជកម្ម​កើនឡើង

អង្គការសហប្រជាជាតិ (UN) បានឱ្យដឹងថា ភាពអត់ឃ្លាននៅទូទាំងពិភពលោកបានធ្លាក់ចុះ ៣ ឆ្នាំជាប់ៗគ្នា ​ដោយនៅឆ្នាំ២០២៥ មានប្រជាជនប្រមាណ ៦៤៥ លាននាក់ ឬ ៧,៨% នៃប្រជាជនពិភពលោកបន្ត​​ជួបភាពអត់ឃ្លាន ធ្លាក់ពី ៨,១% នៅឆ្នាំ២០២៤ និង ៨,៦% នៅឆ្នាំ២០២២។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

របាយការណ៍ស្ដីពីស្ថានភាពសន្តិសុខស្បៀង និងអាហារូបត្ថម្ភនៅលើពិភពលោក​ ដែលរៀបចំដោយទីភ្នាក់ងារ UN ចំនួន ៥ បង្ហាញថា ​ភាពប្រសើរឡើងនេះ ភាគច្រើនកើតចេញពីអាស៊ី ជាពិសេសប្រទេសឥណ្ឌា ព្រមទាំងអាមេរិកឡាទីន និងតំបន់ការ៉ាអ៊ីប។ ទន្ទឹមនឹងនេះ ប្រទេសមួយចំនួននៅអាហ្វ្រិកក៏ចាប់ផ្តើមមានភាពប្រសើរឡើងដែរ ប៉ុន្តែទ្វីបនេះនៅតែមានអ្នកខ្វះអាហារច្រើនជាងគេ គឺប្រមាណ ៣០៩ លាននាក់ ឬ ១ ក្នុងចំណោម ៥ នាក់។

ប្រធានសេដ្ឋវិទូរបស់អង្គការស្បៀងអាហារ និងកសិកម្ម (FAO) របស់ UN លោក Máximo Torero បានប្រាប់រ៉យទ័រថា នេះជាលើកដំបូងហើយក្នុងរយៈពេលប៉ុន្មានឆ្នាំចុងក្រោយ ដែលអត្រាភាពអត់ឃ្លានបានថយចុះនៅគ្រប់ទ្វីបទាំងអស់ រួមទាំងអាហ្វ្រិកផងដែរ ទោះបីជាការធ្លាក់ចុះនៅទីនោះមានតិចតួចក៏ដោយ។

ទោះជាយ៉ាងណា លោកបានព្រមានថា ភាពតានតឹងភូមិសាស្ត្រនយោបាយ ការរំខានដល់ពាណិជ្ជកម្ម និងការប្រែប្រួលអាកាសធាតុ អាចបង្កហានិភ័យដល់សន្តិសុខស្បៀងពិភពលោក។ លោកបានលើកឡើងថា ការរំខានការដឹកជញ្ជូនតាមច្រកសមុទ្រ​ហ័រមូហ្ស បានជំរុញឱ្យថ្លៃប្រេង ឥន្ធនៈ ជីកសិកម្ម និងការដឹកជញ្ជូនកើនឡើង ដែលបង្កើនថ្លៃដើមផលិតកម្មស្បៀងនៅទូទាំងពិភពលោក។

លោក Torero បាននិយាយថា៖ «យើងសង្ឃឹមថា និន្នាការនេះនឹងមិនផ្លាស់ប្តូរទេ ប៉ុន្តែពេលនេះមានហានិភ័យជាច្រើនកំពុងប៉ះពាល់ដល់យើង»។

របាយការណ៍​ដដែលក៏បានបង្ហាញផង​ដែរថា ទោះបីភាពអត់ឃ្លានថយចុះក៏ដោយ មនុស្សប្រមាណ ២,៦៩ ប៊ីលាននាក់ នៅតែមិនអាច​មាន​របបអាហារដែលមានជីវជាតិគ្រប់គ្រាន់​ ខណៈអាហ្វ្រិកជាតំបន់ដែលរងផលប៉ះពាល់ខ្លាំងជាងគេ ដោយប្រជាជន ៦៦,១% មិនមានលទ្ធភាពទទួលបានអាហារដែលមានជីវជាតិ៕