នាយករដ្ឋមន្រ្តីអ៊ីស្រាអែល ថា អាមេរិកកំពុងគាំទ្រប្រទេសខ្លួន ហើយរាល់ការវាយប្រហារគឺមិនឲ្យជនស៊ីវិលគ្រោះថ្នាក់ឡើយ

រហូតមកដល់ពេលនេះ អ៊ីស្រាអែលនៅតែបន្តការវាយប្រហារ តាមអាកាសទៅលើតំបន់ហ្គាហ្សាស្ទ្រីប ខណៈដែលលោកនាយករដ្ឋមន្រ្តី Benjamin Netanyahu អះអាងថា ប្រទេសនេះមានការគាំទ្រពីសហរដ្ឋអាមេរិក ។

យោធាអ៊ីស្រាអែលបានធ្វើការវាយប្រហារតាមអាកាស ជាច្រើនលើកច្រើនសារ ទៅលើតំបន់ហ្គាហ្សា ខណៈអំពើហិង្សារវាងកម្លាំងអ៊ីស្រាអែល និងក្រុមឥស្លាមជ្រុលនិយមហាម៉ាស ដែលគ្រប់គ្រងតំបន់ហ្គាហ្សាស្ទ្រីប បានបន្តកើតមាន ចាប់តាំងពីថ្ងៃទី១០ ឧសភា ។

លោក Netanyahu បានប្រាប់ក្រុមអ្នកសារព័ត៌មានកាលពីថ្ងៃចន្ទថា ប្រទេសរបស់លោកមានការគាំទ្រពីសហរដ្ឋអាមេរិក ហើយថា ខ្លួននឹងបន្តការវាយប្រហារដើម្បីស្តារសន្តិភាព និងសន្តិសុខដល់ប្រជាជនអ៊ីស្រាអែល ។

ទន្ទឹមនោះ អ៊ីស្រាអែលទទូចថា ការវាយប្រហារតាមអាកាសរបស់ខ្លួន លើទីតាំងរបស់ក្រុមហាម៉ាស ត្រូវបានធ្វើឡើង បន្ទាប់ពីការព្រមានជាមុន ដើម្បីចៀសវាងការបង្កគ្រោះថ្នាក់ដល់ជនស៊ីវិល ។ ប៉ុន្តែគោលដៅទាំងនោះ ក៏មានជំរុំជនភៀសខ្លួនប៉ាឡេស្ទីន ផងដែរ ។

ស្របពេលជាមួយគ្នានេះ រដ្ឋាភិបាលសហរដ្ឋអាមេរិក ក៏បានបញ្ជូនមន្រ្តីជាន់ខ្ពស់ នៃក្រសួងការបរទេសអាមេរិក ទៅកាន់តំបន់រងគ្រោះផងដែរ ហើយតាមសេចក្តីរាយការណ៍ ក្រុមមន្ត្រីទាំងនោះបានជួបពិភាក្សាតាមទូរស័ព្ទ ជាមួយមន្រ្តីនៃប្រទេសជុំវិញដូចជា អេហ្ស៊ីប និងកាតា ជាដើម ។

រហូតមកដល់ពេលនេះ ក្រុមប្រឹក្សាសន្តិសុខអង្គការសហប្រជាជាតិ មិនបានទទួលយកការឆ្លើយតប រួមគ្នាណាមួយនៅឡើយទេ ។ សមាជិកជាច្រើនកំពុងព្រួយបារម្ភ ពីចំនួនអ្នកស្លាប់ និងរបួសយ៉ាងច្រើននៅលើទឹកដីប៉ាឡេស្ទីន ខណៈដែលសហរដ្ឋអាមេរិក គាំទ្រសិទ្ធិរបស់អ៊ីស្រាអែលក្នុងការការពារខ្លួន ។

គិតត្រឹមពេលនេះ យ៉ាងហោចណាស់ ប្រជាជនប៉ាឡេស្ទីនចំនួន ២១២ នាក់ត្រូវបានសម្លាប់ រួមទាំងកុមារ ៦១ នាក់ផងដែរ នៅក្នុងការវាយប្រហាររបស់អ៊ីស្រាអែល ទៅលើតំបន់ហ្គាហ្សាស្ទ្រីប ចាប់តាំងពីសប្តាហ៍មុន ។ នេះបើយោងតាមក្រសួងសុខាភិបាលប៉ាឡេស្ទីន ដែលមានមូលដ្ឋាននៅតំបន់ហ្គាហ្សា ។

បន្ថែមពីនេះ មនុស្សជាង ១១,៣០៥ នាក់បានរងរបួស ហើយអគាររាប់សិបត្រូវបានបំផ្លាញ ឬខូចខាតនៅក្នុងការវាយប្រហាររបស់អ៊ីស្រាអែល ខណៈនៅអ៊ីស្រាអែលវិញ មនុស្ស ១០ នាក់ក៏ត្រូវបានសម្លាប់ ដោយគ្រាប់រ៉ុកកែតរបស់ប៉ាឡេស្ទីន ពីតំបន់ហ្គាហ្សាស្ទ្រីបផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ សម្ដែងការគាំទ្រដល់បទឈប់បាញ់គ្នានៅតំបន់ហ្គាហ្សា តែ ប្រធានាធិបតីអាមេរិក ចុះហត្ថលេខាលក់អាវុធទៅឲ្យ អ៊ីស្រាអែល

ចុចអាន ៖ នាយករដ្ឋមន្ត្រីអ៊ីស្រាអែល ថា ការវាយប្រហារកម្ទេចអគារសារព័ត៌មាន AP និង Al-Jazeera ក្នុងតំបន់ហ្គាហ្សា ជា “គោលដៅស្របច្បាប់”