ឆេះអគារផ្ទះល្វែងនៅហុងកុង សម្លាប់មនុស្ស ៧ នាក់ និងរបួស ១៣ នាក់

អាជ្ញាធរហុងកុងបាននិយាយថា អគ្គិភ័យនៅអគារផ្ទះល្វែងមួយកន្លែងនៅសង្កាត់ដែលមានប្រជាជនរស់នៅច្រើនកុះករបានសម្លាប់មនុស្សយ៉ាងហោចណាស់ ៧ នាក់ និង ១៣ នាក់ផ្សេងទៀតរងរបួស ខណៈអ្នកស្លាប់មានអាយុពី ៩ ទៅ ៤០ ឆ្នាំ ។

ការឆាបឆេះនេះបានកើតឡើងកាលពីថ្ងៃអាទិត្យ ទី១៥ ខែវិច្ឆិកា នៅតំបន់ Yau Ma Tei ដែលជាតំបន់អ៊ូអរនៅទីប្រជុំជន Kowloon ដែលផ្ទុកទៅដោយប្លុកផ្ទះល្វែងចាស់ៗ ហាង និងអាជីវកម្មនានា ។

មន្ត្រីពន្លត់អគ្គិភ័យបាននិយាយនៅក្នុងសន្និសីទសារព័ត៌មានមួយនៅព្រឹកថ្ងៃចន្ទនេះថា អគ្គិភ័យបានឆាបឆេះនៅក្នុងភោជនីយដ្ឋានមួយដែលមានទីតាំងស្ថិតនៅក្នុងផ្ទះល្វែងនៃអគារលំនៅដ្ឋាននេះ ។ មន្ត្រីបាននិយាយថា មូលហេតុនៃអគ្គិភ័យនេះនៅមិនទាន់ដឹងនៅឡើយទេ ។

យោងតាមមន្រ្តីនាយកដ្ឋានសេវាកម្មអគ្គិភ័យលោក Cheung Kwong-yen បាននិយាយថា អគារនេះមិនមានប្រព័ន្ធបញ្ចេញទឹកនោះទេ ហើយមនុស្សបានជាប់នៅខាងក្រោយផ្ទះបាយ ។

សេចក្តីរាយការណ៍ពីប្រព័ន្ធផ្សព្វផ្សាយក្នុងស្រុកបាននិយាយថា ប្រជាជននៅក្នុងភោជនីយដ្ឋាននេះកំពុងធ្វើពិធីអបអរសាទរនៃបុណ្យ Deepavali រួមជាមួយថ្ងៃខួបកំណើត នៅពេលដែលអគ្គិភ័យបានកើតឡើង ។

ទន្ទឹមនោះមេដឹកនាំហុងកុងលោកស្រី Carrie Lam បានចេញសេចក្តីថ្លែងការណ៍ភ្លាមៗ បន្ទាប់ពីពាក់កណ្តាលអធ្រាត្រដោយនិយាយថា លោកស្រីមានការសោកស្តាយយ៉ាងខ្លាំងដែលអគ្គិភ័យនៅក្នុងតំបន់ Yau Yau Tei បណ្តាលឲ្យមានមនុស្សស្លាប់ និងរងរបួសជាច្រើន ។ លោកស្រីក៏បានទៅមើលទីតាំងនៃអគ្គិភ័យនៅព្រឹកថ្ងៃចន្ទនេះផងដែរ ។

គួរបញ្ជាក់ថា ឧប្បត្តិហេតុនេះបង្ហាញពីបញ្ហាសុវត្ថិភាពអគ្គិភ័យនៅក្នុងអគារចាស់ៗនៅហុងកុងដែលមួយចំនួនមិនត្រូវបានបំពាក់ដោយប្រព័ន្ធគ្រប់គ្រងសុវត្ថិភាពអគ្គិភ័យសមស្របនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ចិនឆ្លើយតបបែបណាវិញ ក្រោយ Trump ចេញបញ្ជាហាមឃាត់ការវិនិយោគរបស់អាមេរិកជាមួយក្រុមហ៊ុនដែលជួយដល់យោធាខ្លួន

ចុចអាន ៖ លោក គីម ជុងអ៊ុន បញ្ជាឲ្យបន្ថែមការរឹតបន្តឹងលើវិធានការប្រឆាំងជំងឺកូវីដ ១៩ ខណៈករណីឆ្លងលើពិភពលោកកំពុងកើនឡើងខ្លាំង