ពលរដ្ឋ អូស្រ្តាលី ១០ លាននាក់រស់នៅក្រោមការបិទខ្ទប់ ខណៈវីរុសបំប្លែងខ្លួនឥណ្ឌាកំពុងអុកឡុកខ្លាំង

ប្រជាជនអូស្រ្តាលីជាង ១០ លាននាក់ត្រូវបានគេបញ្ជាឲ្យរស់នៅក្រោមការបិទខ្ទប់ ខណៈដែលករណីឆ្លងជំងឺកូវីដ ១៩ កំពុងរាលដាលពាសពេញប្រទេស ហើយទីក្រុង Brisbane នៅថ្ងៃអង្គារនេះ បានក្លាយជាទីក្រុងធំទី ៤ ដែលចេញបទបញ្ជាស្នាក់នៅផ្ទះ ។

ការបិទខ្ទប់រយៈពេល ៣ ថ្ងៃសម្រាប់ទីក្រុង Brisbane ដែលចាប់ផ្តើមនៅល្ងាចថ្ងៃអង្គារនេះ កើតឡើងលើវិធានការស្រដៀងគ្នាដែលបានដាក់នៅក្នុងទីក្រុង Sydney ទីក្រុង Perth និងទីក្រុង Darwin នៅក្នុងប៉ុន្មានថ្ងៃថ្មីៗនេះ ។

ទន្ទឹមនោះ ការប្រកាសនេះ ធ្វើឡើងក្នុងអំឡុងពេលវិស្សមកាលសាលារៀន សម្រាប់ផ្នែកធំៗនៃប្រទេស ហើយក៏ត្រូវបានគេរំពឹងថា នឹងបង្កឲ្យមានការលុបចោល ការធ្វើដំណើរជាមួយរដ្ឋដែលគ្មានផលប៉ះពាល់ ក៏ដូចជាព្រមានប្រជាជន មិនឲ្យទៅទស្សនាតំបន់ដែលរងផលប៉ះពាល់ផងដែរ ។

បន្ថែមពីនេះ នៅគ្រប់តំបន់ដែលបិទខ្ទប់ ជាទូទៅមនុស្សត្រូវស្នាក់នៅក្នុងផ្ទះ លើកលែងតែការងារចាំបាច់ ការធ្វើលំហាត់ប្រាណ ទិញគ្រឿងទេស ឬសម្រាប់ហេតុផលវេជ្ជសាស្រ្តជាដើម ។

បច្ចុប្បន្ន ប្រទេសអូស្ត្រាលីកំពុងតែប្រយុទ្ធប្រឆាំងនឹងការផ្ទុះឡើងនៃវីរុសបំប្លែងខ្លួនឥណ្ឌា “Delta” ខណៈប្រជាពលរដ្ឋក៏មានការខឹងសម្បារផងដែរ ពាក់ព័ន្ធនឹងល្បឿនយុទ្ធនាការចាក់វ៉ាក់សាំងយឺតយ៉ាវ ដោយរហូតមកដល់ពេលនេះ ប្រជាជនពេញវ័យតិចជាង ៥ ភាគរយប៉ុណ្ណោះ បានទទួលការចាក់វ៉ាក់សាំងពេញ ២ ដូស ។

ពាក់ព័ន្ធនឹងសម្ពាធបែបនេះ រដ្ឋាភិបាលរបស់លោកនាយករដ្ឋមន្រ្តី Scott Morrison បានប្រកាសថា ការពាក់ម៉ាស និងការចាក់វ៉ាក់សាំងនឹងក្លាយជាកាតព្វកិច្ចចាំបាច់ សម្រាប់មនុស្សចាស់ និងបុគ្គលិកនៅសណ្ឋាគារដាក់អ្នកធ្វើចត្តាឡីស័ក ខណៈវ៉ាក់សាំង AstraZeneca អាចត្រូវបានចាក់សម្រាប់មនុស្សដែលមានអាយុក្រោម ៦០ ឆ្នាំ ។

គួរបញ្ជាក់ថា គិតត្រឹមពេលនេះ ប្រទេសអូស្រ្តាលីបានកត់ត្រានូវករណីឆ្លងជំងឺកូវីដ ១៩ សរុបជាង ៣០,០០០ ករណី និងមានអ្នកស្លាប់ ៩១០ នាក់ នៅក្នុងចំនួនប្រជាជនប្រមាណ ២៥ លាននាក់ ចាប់តាំងពីរោគរាតត្បាតនេះបានចាប់ផ្តើម ៕

ប្រែសម្រួលដោយ ៖ ជីវ័ន្ត

ប្រភព ៖ Japan Today

ចុចអាន ៖ ក្រុង​ស៊ីដនី​សុខសាន្ត​ជិត ​១ ​ឆ្នាំហើយ​ ឥឡូវ​ផ្ទុះកូវីដ បំរាម​គោចរ​ត្រូវបានដាក់