ព័ត៌មានអន្ដរជាតិ

ថៃស្រពេចស្រពិលគម្រោងបើកទេសចរណ៍ឡើងវិញ

បានផុស

៣ years មុន

នៅ

ថ្ងៃសុក្រ ៩ កក្កដា ២០២១

ដោយ

chean virakbot

ផែនការបើកទេសចរណ៍ឡើងវិញរបស់ប្រទេសថៃដើម្បីទទួលភ្ញៀវបរទេសក្នុងរយៈពេល១០០ថ្ងៃបានជួបកង្វល់ដោយសារកូវីដ-១៩មិនថមថយសោះ។

នៅថ្ងៃសុក្រនេះ ក្រសួងសុខាភិបាលថៃ បានប្រកាសមានអ្នកស្លាប់ថ្មីដោយសារកូវីដ-១៩ចំនួន ៧២នាក់ និងឆ្លង ៩ ២៧៦ នាក់ ក្នុងរយៈពេល២៤ម៉ោងចុងក្រោយ បន្ទាប់ពីកាលពីថ្ងៃព្រហស្បតិ៍ឆ្លងជាង៧០០០នាក់ និងស្លាប់៧៥នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីឆ្នាំមុន ថៃទប់ស្កាត់កូវីដ-១៩បានជោគជ័យដែលធ្វើឲ្យករណីធ្លាក់បានចុះដល់ត្រឹមមួយខ្ទង់។ ប៉ុន្តែការផ្ទុះឆ្លងជាថ្មីបានកំពុងវាយប្រហារថៃយ៉ាងធ្ងន់ធ្ងរបំផុត ជាពិសេសវីរុសឆ្លងសាហាវ Delta រាលដាលស្ទើរពេញផ្ទៃប្រទេសហើយ។

នៅពេលរដូវកាលទេសចរណ៍ឈានចូលមកដល់ ឧស្សាហកម្មទេសចរណ៍ថៃត្រូវបានរងផលប៉ះពាល់យ៉ាងខ្លាំងដោយកូវីដ-១៩។ ដូច្នេះគម្រោងបើកទេចរណ៍ឡើងវិញដើម្បីទទួលជនបរទេសទំនងជាត្រូវផ្អាក។

កាលពីខែមុន លោកនាយករដ្ឋមន្ត្រីថៃ ប្រាយុទ្ធ ចាន់ អ៊ូចា បានកំណត់ពេលវេលា១២០ថ្ងៃដើម្បីបើកប្រទេសទាំងស្រុងវិញក្នុងនោះគឺសកម្មភាពអាជីវកម្ម ពាណិជ្ជកម្មត្រូវត្រឡប់មកធម្មតាវិញ ហើយបើកសេរីឲ្យភ្ញៀវទេសចរណ៍ដែលចាក់វ៉ាក់សាំងរួចដើរទូទាំងប្រទេស។

កាលពីដើមសប្តាហ៍មុន ថៃបានបើកទ្វារទទួលភ្ញៀវទេសចរបរទេសដោយមិនចាំបាច់ធ្វើចត្តាឡីស័កដើម្បីកម្សាន្តនៅកោះភូកេត។

ភ្លាមៗនោះ អ្នកទេសចរណ៍ប្រមាណ២០០០នាក់បានចូលទៅតំបន់ភូកេត បន្ទាប់ពីផែនការ«ប្រអប់ខ្សាច់ភូកេត»ត្រូវបានបើកដំណើរការ។

មិនយូរប៉ុន្មាន នៅថ្ងៃពុធកន្លងទៅ ភូកេតបានរាយការណ៍ពីការរកឃើញជនបរទេសឆ្លងកូវីដ-១៩ទី១ដែលបុរសនោះគឺជាអ្នកដំណើរមកពីអារ៉ាប់រួម។

ទោះជាយ៉ាងណា ករណីឆ្លងច្រើនបំផុតនៅក្នុងប្រទេសបានកើនមានខ្លាំងនៅទីក្រុងបាំងកក។ អ្នកជំនាញសុខភាពបាននិយាយថា បធ្យោបាយតែមួយគត់បញ្ឈប់ការឆ្លងគឺដាក់បំរាម។ បំរាមគោចរតឹងរឹងត្រូវបានដាក់នៅតាមភោជនីយដ្ឋាន និងការដ្ឋានសំណង់ ប៉ុន្តែមិនបានដាក់បំរាមពេញបន្ទុកទេ។

លោកវេជ្ជបណ្ឌិរ Anan Jongkaewwattana ប្រធានក្រុមការងារស្រាវជ្រាវនៅមជ្ឈមណ្ឌលជាតិសម្រាប់វិស្វកម្មហ្សែនេទិក និងជីវបច្ចេកវិទ្យាបាននិយាយថា ៖«ការដាក់បំរាមតឹងតែងគឺជាមធ្យោបាយតែមួយគត់»។

លោកថា ៖«ប្រសិនបើស្ថានភាពនៅតែបន្តបែបនេះ ការផ្ទុះឆ្លងនៅថៃនឹងធ្ងន់ធ្ងរជាងនៅប្រទេសឥណ្ឌូណេស៊ី បើគិតជាចំនួនឆ្លងធៀបនឹងចំនួនប្រជាជន ដែលអាចនឹងឆ្លងប្រចាំថ្ងៃច្រើនដល់២ម៉ឺននាក់នៅខែខាងមុខ»៕

ប្រែសម្រួល៖ វីរបុត្រ
ប្រភព៖ BBC