អ៊ីស្រាអែល បន្តចាក់ដូសទី ៣ ដល់ក្រុមមនុស្សមួយប្រភេទទៀត

បើយោងតាមទូរទស្សន៍ព័ត៌មាន Kan TV របស់អ៊ីស្រាអែលបានរាយការណ៍កាលពីថ្ងៃព្រហស្បតិ៍ថា អ៊ីស្រាអែលបានសម្រេចចិត្តបន្ថយអាយុ អ្នកដែលមានសិទ្ធិទទួលការចាក់វ៉ាក់សាំងការពារជំងឺកូវីដ ១៩ ដូសទី ៣ ឬដូសជំរុញពី ៥០ មក ៤០ ឆ្នាំ ។

របាយការណ៍នេះបាននិយាយថា គណៈកម្មាធិការជំនាញនៃក្រសួងសុខាភិបាលអ៊ីស្រាអែល បានណែនាំឲ្យចាក់វ៉ាក់សាំងដល់មនុស្សដែលមានអាយុលើសពី ៤០ ឆ្នាំ ក៏ដូចជាគ្រូបង្រៀនគ្រប់វ័យទាំងអស់ ដោយសារតែការកើនឡើងយ៉ាងខ្លាំង នៃករណីឆ្លងជំងឺកូវីដ ១៩ នៅក្នុងប្រទេសនេះ ។

ការសម្រេចចិត្តនេះ ត្រូវបានគេរំពឹងថានឹងចូលជាធរមាននៅថ្ងៃសុក្រនេះ បន្ទាប់ពីមានការយល់ព្រមពីលោក Nachman Ash អ្នកសម្របសម្រួល​ការប្រយុទ្ធប្រឆាំងជំងឺ​កូវីដ ១៩​ របស់​អ៊ីស្រាអែល​ ។

គួរបញ្ជាក់ថា រហូតមកដល់ពេលនេះមនុស្សជិត ១.២៥ លាននាក់បានទទួលការចាក់វ៉ាក់សាំងដូសទី ៣ នៅអ៊ីស្រាអែល ក្នុងនោះប្រហែល ១.៩ លាននាក់គឺជាអ្នកមានអាយុ ៥០ ឆ្នាំ និងលើសពីនេះ ដែលបានចាក់ដូសទី ២ ច្រើនជាង ៥ ខែមុន ។

ទន្ទឹមនោះ ចំនួនមនុស្សដែលបានទទួលវ៉ាក់សាំងការពារជំងឺកូវីដ ១៩ ដូសដំបូងនៅអ៊ីស្រាអែល ឈានដល់ជិត ៥.៨៨ លាននាក់ ឬ ៦៣ ភាគរយនៃចំនួនប្រជាជនសរុប ខណៈជាង ៥.៤ លាននាក់បានចាក់ ២ ដូស ហើយជិត ១.២៥ លាននាក់ទទួលបានការចាក់ដូសទី ៣ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ អ៉ីស្រាអែល​ ចាប់​ចាក់​ដូស​ទី ​៣ ​ដល់មនុស្ស​អាយុ​ ៥០ ឆ្នាំ ក្រោយ​ចាក់អាយុ ៦០ ឆ្នាំ