ចលនាតស៊ូប្រដាប់អាវុធអាហ្វហ្គានីស្ថាន កំពុងប្រមូលផ្តុំ ដើម្បីប្រយុទ្ធជាមួយ​ តាលីបង់

រដ្ឋមន្ត្រីការបរទេសរុស្ស៊ីលោក Sergei Lavrov បានបញ្ជាក់ថា កម្លាំងប្រដាប់អាវុធ ដែលតស៊ូប្រឆាំងក្រុមតាលីបង់ រួមបញ្ចូលទាំងកងកម្លាំងដែលទទួលបានការបណ្តុះបណ្តាលពី SAS នៅក្នុងប្រទេសអាហ្វហ្គានីស្ថានផងដែរនោះ កំពុងបង្កើតឡើងនៅជ្រលងភ្នំ Panjshir។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីរុស្ស៊ីរូបនេះ ក៏បានបញ្ជាក់ផងដែរថា កម្លាំងតស៊ូនេះ ត្រូវបានដឹកនាំដោយលោកអនុប្រធានាធិបតី Amrullah Saleh និងលោក Ahmad Massoud ដែលត្រូវជាកូនប្រុសរបស់យុទ្ធជនប្រឆាំងក្រុមតាលីបង់ ដែលត្រូវគេសម្លាប់។

របាយការណ៍អះអាងថា ក្នុងចំណោមអ្នកប្រយុទ្ធដែលធ្វើដំណើរឆ្ពោះទៅតំបន់នេះ គឺជាសមាជិកនៃកងកម្លាំងពិសេសអាហ្វហ្គានីស្ថាន ដែលបានទទួលការបណ្តុះបណ្តាលពី SAS និងជាកងកម្លាំងល្អផ្តាច់គេក្នុងយោធាអាហ្វហ្គានីស្ថាន។

លោក Lavrov បានប្រាប់អ្នកយកព័ត៌មានក្នុងសន្និសីទសារព័ត៌មានមួយ នៅទីក្រុងមូស្គូបន្ទាប់ពីកិច្ចប្រជុំជាមួយសមភាគីលីប៊ីថា “តាលីបង់ មិនមែនគ្រប់គ្រងទឹកដីអាហ្វហ្គានីស្ថានទាំងមូលទេ។  មានរបាយការណ៍ អំពីស្ថានភាពនៅជ្រលងភ្នំ Panjshir ដែលនៅទីនោះ ចលនាតស៊ូរបស់អនុប្រធានាធិបតីអាហ្វហ្គានីស្ថានលោក Saleh និងលោក Ahmad Massoud ត្រូវបានប្រមូលផ្តុំ”។

លោក Lavrov ក៏បានបញ្ជាក់ជាថ្មីផងដែរ អំពីការអំពាវនាវរបស់លោក ឲ្យមានកិច្ចពិភាក្សាដែលមានការចូលរួមពីគ្រប់តួអង្គនយោបាយនៅអាហ្វហ្គានីស្ថាន សម្រាប់ការបង្កើតរដ្ឋាភិបាលតំណាង។

ជ្រលងភ្នំ Panjshir នៅភាគឦសានទីក្រុងកាប៊ុល គឺជាមូលដ្ឋាននៅសល់ចុងក្រោយបំផុត របស់ប្រទេសអាហ្វហ្គានីស្ថាន។

យោងតាមរូបភាពដែលគេចែករំលែកនៅលើបណ្តាញសង្គម បានបង្ហាញថា លោក Saleh និងលោក Massoud កំពុងរួមគ្នាបង្កើតចលនាទ័ពព្រៃដើម្បីទប់ទល់នឹងក្រុមតាលីបង់។

លោក Ahmad Massoud កាលពីថ្ងៃព្រហស្បតិ៍បាននិយាយថា គាត់បានត្រៀមខ្លួនរួចជាស្រេចដើម្បីដើរតាមគន្លងឪពុករបស់គាត់កម្ទេចក្រុមតាលីបង់៕

ប្រែសម្រួល៖ Vann Vann

ប្រភព៖ Daily Mail