អាមេរិកព្រមានពលរដ្ឋឱ្យឈប់ប្រើថ្នាំមួយប្រភេទសម្រាប់ព្យាបាលជំងឺកូវីដ-១៩

រដ្ឋបាលចំណីអាហារនិងឱសថ អាមេរិក ​(FDA) បានចេញសេចក្ដីព្រមានមួយកាលពីថ្ងៃសៅរ៍ ដោយមិនអនុញ្ញាតឱ្យពលរដ្ឋរបស់ខ្លួនប្រើថ្នាំប្រឆាំងនឹងប៉ារ៉ាស៊ីតសម្រាប់សត្វពាហនៈដើម្បីព្យាបាលឬការពារកូវីដ-១៩នោះទេ។

ទីភ្នាក់ងារ FDA ថ្លែងៗខ្លាំងៗថា “អ្នកមិនមែនជាសេះ ហើយក៏មិនមែនជាគោដែរ។ ការប្រើថ្នាំប្រភេទនេះអាចបង្កភាពធ្ងន់ធ្ងរដល់គ្រប់គ្នាបាន។”

បើទោះបីខ្វះភស្តុតាងវិទ្យាសាស្ត្រអះអាងអំពីប្រសិទ្ធភាពថ្នាំ ivermectin ក្នុងការបន្ថយឱកាសឆ្លងវីរុសកូវីដ-១៩ឬអាចព្យាបាលជំងឺនេះក្ដី ក៏មនុស្សជាច្រើនក្នុងរដ្ឋ Mississippi បានប្រើថ្នាំ ivermectin ដើម្បីព្យាបាលកូវីដ-១៩ដោយខ្លួនឯង យ៉ាងភ្លូកទឹកភ្លូកដី។ នេះបើតាមការបញ្ជាក់ពីប្រធានការិយាល័យសុខាភិបាលរបស់រដ្ឋ លោក Thomas Dobbs ។

ដោយសារការផ្អើលតាមគ្នាថាថ្នាំ ivermectin​ អាចការពារកូវីដ-១៩បានស័ក្តិសិទ្ធិ បន្ទាប់ពីលេបថ្នាំរួច​មនុស្សម្នាក់ត្រូវបញ្ជូនទៅមន្ទីរពេទ្យភ្លាមៗ កាលពីថ្ងៃសុក្រ សប្ដាហ៍មុន។ ក្រៅពីនោះ មនុស្សយ៉ាងហោចណាស់ ៧០ ភាគរយដែលហៅទូរសព្ទទៅមជ្ឈមណ្ឌលសុខភាព សុទ្ធតែជាអ្នកលេបថ្នាំនេះ ហើយបានពុលវា។ ពួកគេភាគច្រើនមានអាការធ្ងន់ធ្ងរដូចជា កន្ទួល ចង្អោរ ក្អួត ឈឺពោះ វង្វេងវង្វាន់ និងខ្លះមានបញ្ហារលាកថ្លើមដែលតម្រូវឱ្យមានការវះកាត់ផងដែរ។

ក្រោយកើតមានករណីបែបនេះ មន្ទីរសុខាភិបាលអង្វរកពលរដ្ឋ កុំប្រើថ្នាំ ivermectin ដែលវាផលិតសម្រាប់តែសត្វប៉ុណ្ណោះ។ ទោះបីមានករណីខ្លះគេប្រើព្យាបាលមនុស្ស តែមិនមែនចេះតែប្រើឡើយ ហើយក៏មិនមែនសម្រាប់ជំងឺកូវីដដែរ ដែលពួកគេទាំងនោះសុទ្ធសឹងការធ្វើរោគវិនិច្ឆ័យត្រឹមត្រូវជាមុន។

ដោយឡែក FDA ព្រមានបន្ថែមថា ថ្នាំ ivermectin មិនមែនជាថ្នាំប្រឆាំងវីរុសកូវីដ-១៩ទេ ហើយការប្រើថ្នាំនេះក្នុងកម្រិតច្រើននឹងបង្កគ្រោះថ្នាក់ធ្ងន់ធ្ងរ៕

ប្រែសម្រួល៖ សន្យា

ប្រភព៖ Daily Mail

ចុចអាន៖ អ៊ីស្រាអែល រកឃើញថា វ៉ាក់សាំងដូសទី៣ កាត់បន្ថយហានិភ័យនៃការឆ្លង គួរឲ្យកត់សម្គាល់

ចុចអាន៖ វៀតណាម ចាប់បានក្រុមផលិតថ្នាំ ព្យាបាលកូវីដ ក្លែងក្លាយ