មិនធម្មតាឡើយ! មកមើលចលនាតស៊ូអាហ្វហ្គានីស្ថាន កំពុងហ្វឹកហាត់ លុតដំ យ៉ាងសស្រាក់សស្រាំ ត្រៀមប្រយុទ្ធជាមួយក្រុម តាលីបង់ 

កងកម្លាំងតស៊ូនៅប្រទេសអាហ្វហ្គានីស្ថាន បានប្តេជ្ញាបន្តការប្រយុទ្ធប្រឆាំងនឹងក្រុមតាលីបង់ ខណៈពួកគេបានហ្វឹកហាត់នៅជ្រលងភ្នំ Panjshir ដែលជាបន្ទាយយុទ្ធសាស្ត្រមួយ ស្ថិតនៅភាគខាងជើងទីក្រុងកាប៊ុល។

អ្នកប្រយុទ្ធរាប់រយនាក់ ដែលមិនចុះចាញ់អ្នកគ្រប់គ្រងថ្មីនៃទីក្រុងកាប៊ុល ត្រូវបានគេឃើញដើរកាត់ទឹក និងលីឈើ ខណៈអ្នកផ្សេងទៀត ហ្វឹកហាត់ជាមួយកាំភ្លើងយ៉ាងសស្រាក់សស្រាំ នៅពេលពួកគេត្រៀមខ្លួនសម្រាប់ការមកដល់របស់កងកម្លាំងតាលីបង់។

នៅកន្លែងផ្សេង សមាជិកចលនាតស៊ូផ្សេងទៀតដែលស្លៀកពាក់ឈុតយោធា និងកាន់អាវុធ ត្រូវបានគេឃើញធ្វើដំណើរកាត់តាមដងផ្លូវស្ងាត់ៗនៃតំបន់ភ្នំ។

កងកម្លាំងបះបោរប្រឆាំងតាលីបង់ ដែលត្រូវបានគេស្គាល់ថា សម្ព័ន្ធខាងជើង បានប្តេជ្ញាប្រយុទ្ធដល់នាទីចុងក្រោយនិងការពារប្រជាជន ១៧០,០០០ នាក់ ដែលភាគច្រើនជាជនជាតិ Tajiks រស់នៅជ្រលងភ្នំ Panjshir។

រឿងនេះបានកើតឡើង ចំពេលក្រុមតាលីបង់ អះអាងថា ពួកគេកំពុងបញ្ជូនយុទ្ធជនរាប់រយនាក់ទៅកាន់តំបន់នោះ ហើយបានឡោមព័ទ្ធជ្រលងភ្នំ Panjshir។

បន្ទាយចុងក្រោយរបស់អាហ្វហ្គានីស្ថានប្រឆាំងនឹងពួកតាលីបង់ កំពុងត្រូវបានដឹកនាំដោយអ្នកទទួលបានការអប់រំនៅចក្រភពអង់គ្លេសឈ្មោះ Ahmad Massoud អាយុ៣២ឆ្នាំ ជាកូនប្រុសរបស់អ្នកប្រយុទ្ធសេរីភាព នៅជ្រលងភ្នំ Panjshir។

លោក Massoud ដែលទទួលការបណ្តុះបណ្តាលដោយយោធាអង់គ្លេសនៅទីក្រុង Sandhurst បានប្តេជ្ញាថា មិនឲ្យអ្នកប្រយុទ្ធតាលីបង់ណាម្នាក់ ឆ្លងកាត់ច្រកតូចចង្អៀតចូលមកក្នុងជ្រលងភ្នំនេះទេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ បែក ធ្លាយ របាយការណ៍៖ អាមេរិក នៅ បើក ចំហ ច្រក ព្រលាន កាប៊ុល មុន ពេល ការវាយប្រហារ