បារាំង ចាប់ផ្តើមចាក់វ៉ាក់សាំងបង្ការកូវីដ ដូសជំរុញ

ប្រទេសបារាំង បានចាប់ផ្តើមចាក់វ៉ាក់សាំងបង្ការជំងឺកូវីដ-១៩ដូសជំរុញ ដល់មនុស្សដែលមានអាយុលើសពី៦៥ឆ្នាំ និងអ្នកដែលមានសុខភាពចុះខ្សោយ។

អ្នកដែលមានលក្ខណៈគ្រប់គ្រាន់សម្រាប់ចាក់វ៉ាក់សាំងដូសជំរុញនេះ លុះត្រាតែពួកគេជាអ្នកចាក់វ៉ាក់សាំង Pfizer ឬ Moderna គ្រប់ដូស បានរយៈពេល៦ខែ។

ប៉ុន្តែអ្នកទទួលវ៉ាក់សាំង Johnson & Johnson ដែលចាក់តែមួយដូស គឺអាចចាក់ថ្នាំ Pfizer ឬ Moderna ក្នុងរយៈពេលបួនសប្តាហ៍បន្ទាប់ពីពួកគេបានចាក់វ៉ាក់សាំងនោះ។

ទោះបីជាយ៉ាងណាក៏ដោយ យុទ្ធនាការចាក់ដូសជំរុញទូទាំងប្រទេស គឺនឹងចាប់ផ្តើមនៅក្នុងមណ្ឌលថែទាំនៅថ្ងៃទី១២ខែកញ្ញា។

ក្រសួងសុខាភិបាលនិយាយថា មនុស្សប្រហែល១៨លាននាក់ ត្រូវបានគេប៉ាន់ស្មានថាមានសិទ្ធិទទួលបានការចាក់ថ្នាំបង្ការរោគ ដូសជំរុញ។

ការចាក់វ៉ាក់សាំងនេះ កើតឡើងចំពេលដែលរដ្ឋាភិបាលនិយាយថា ពួកគេត្រៀមខ្លួនដើម្បីចាប់ផ្តើមគ្រោងការណ៍ចាក់ដូសជំរុញ រីឯ NHS របស់ប្រទេសអង់គ្លេស បានត្រៀមខ្លួនរួចជាស្រេចដើម្បីចាប់ផ្តើមចាក់ដល់អ្នកដែលងាយរងគ្រោះបំផុតចាប់ពីថ្ងៃទី ៦ ខែកញ្ញាទៅ។

ថ្នាក់ដឹកនាំ NHS មានគម្រោងចាក់វ៉ាក់សាំងដល់ក្រុមមនុស្សអាយុលើស៥០ឆ្នាំ និងអ្នកដែលមានប្រព័ន្ធការពារចុះខ្សោយចំនួន ៣០លាននាក់ បើទោះបីជាគ្មានការប្រកាសជាផ្លូវការក៏ដោយ៕

ប្រែសម្រួល៖ Vann Vann

ប្រភព៖ Sky

ចុចអាន៖ អាមេរិក បោះចោលវ៉ាក់សាំងកូវីដជាង ១៥ លានដូស ខណៈប្រទេសក្រីក្រកំពុងខ្វះខាតចាក់ដល់ប្រជាជន