ស៊ីរ៉ែនប្រកាសអាសន្នពីអគ្គិភ័យលាន់ទ្រហឹងក្នុងបន្ទប់ស្នូលនៅស្ថានីយអវកាសអន្តរជាតិ ក្រោយក្រុមនាវិក រុស្ស៊ី បញ្ចូលថ្មចោល

អ្នកនាំពាក្យរបស់សាជីវកម្មអវកាសរុស្ស៊ី Roscosmos បានប្រាប់សារព័ត៌មាន Sputnik នៅថ្ងៃព្រហស្បតិ៍នេះថា ស៊ីរ៉ែនប្រកាសអាសន្នពីអគ្គិភ័យ ត្រូវបានបន្លឺឡើងនៅស្ថានីយអវកាសអន្តរជាតិ (ISS) អំឡុងពេលបញ្ចូលថ្ម ហើយប្រព័ន្ធបន្សុតខ្យល់ក៏ត្រូវបានបើកផងដែរដើម្បីកម្ចាត់ផ្សែង ខណៈពេលនេះប្រព័ន្ធ ISS ទាំងអស់បច្ចុប្បន្នដំណើរការធម្មតា ។

នៅព្រឹកថ្ងៃព្រហស្បតិ៍នេះ អវកាសយានិករុស្ស៊ីបានរាយការណ៍ថា មានផ្សែង និងក្លិនឆ្ងៀមប្លាស្ទិកដែលឆេះនៅក្នុងបន្ទប់ស្នូល Zvezda របស់រុស្ស៊ី ។

អ្នកនាំពាក្យខាងលើបានបញ្ជាក់ទៀតថា “នៅព្រឹកម៉ោង ៤ និង ៥៥ នាទី សំឡេងស៊ីរ៉ែនរោទិ៍ត្រូវបានកើតឡើងនៅក្នុងបន្ទប់ស្នូល Zvezda នៃផ្នែកស្ថានីយ ISS របស់រុស្ស៊ី ក្នុងអំឡុងពេលបញ្ចូលថ្មដោយស្វ័យប្រវត្តិ” ។

ទន្ទឹមនោះ ដើម្បីកម្ចាត់ផ្សែង ឬភ្លើងឆេះដែលអាចកើតមាន ក្រុមនាវិកបានបើកតម្រងសម្អាតបរិស្ថាន AFOT ហើយពេលនេះប្រព័ន្ធទាំងអស់ដំណើរការជាធម្មតា ស្របតាមស្តង់ដារលម្ហអាកាស ។

ជាចុងក្រោយ Roscosmos អះអាងថា បច្ចុប្បន្នអវកាសយានិករុស្ស៊ីបន្តត្រៀមរៀបចំសម្រាប់ការដើរក្នុងលម្អអាកាសរបស់ពួកគេ ដែលនឹងប្រព្រឹត្តទៅនៅល្ងាចថ្ងៃព្រហស្បតិ៍នេះ ដោយគ្មានគម្រោងពន្យារពេលនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ UP

ចុចអាន ៖ ថ្នាំព្យាបាលកូវីដឆ្ពុងតាមច្រមុះរបស់ រុស្ស៊ី បង្ហាញលទ្ធផលដ៏អស្ចារ្យក្នុងការសាកល្បង និងជិតសម្រេចប្រើជាផ្លូវការ