កូរ៉េខាងជើងព្រមាន កិច្ចព្រមព្រៀង Aukus នឹងបង្កឲ្យមានការប្រកួតប្រជែងអាវុធនុយក្លេអ៊ែរ

ប្រទេសកូរ៉េខាងជើង បានថ្កោលទោសកិច្ចព្រមព្រៀងសន្តិសុខថ្មី រវាងអាមេរិក អង់គ្លេសនិងអូស្ត្រាលី ដោយនិយាយថា វាអាចបង្កឲ្យមានការប្រកួតប្រជែងអាវុធនុយក្លេអ៊ែរ។

មន្រ្តីក្រសួងការបរទេសម្នាក់បាននិយាយថា កិច្ចព្រមព្រៀង Aukus នឹងធ្វើឲ្យខូចតុល្យភាពយុទ្ធសាស្ត្រ នៅក្នុងតំបន់អាស៊ីប៉ាស៊ីហ្វិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងនេះ នឹងអនុញ្ញាតឲ្យសហរដ្ឋអាមេរិកនិងចក្រភពអង់គ្លេស ផ្តល់ឲ្យអូស្ត្រាលីនូវបច្ចេកវិទ្យា ដើម្បីសាងសង់នាវាមុជទឹកដើរដោយថាមពលនុយក្លេអ៊ែរ។

វាត្រូវបានគេមើលឃើញថា ជាកិច្ចខិតខំប្រឹងប្រែងដើម្បីប្រឆាំងឥទ្ធិពលរបស់ចិន នៅក្នុងសមុទ្រចិនខាងត្បូងដែលមានការប្រកួតប្រជែងខ្ពស់។

កិច្ចព្រមព្រៀង Aukus ត្រូវបានប្រកាសកាលពីសប្តាហ៍មុន ហើយនឹងគ្របដណ្តប់លើកាំជ្រួចមីស៊ីលផ្លោង បច្ចេកវិទ្យា AI និងបច្ចេកវិទ្យាផ្សេងទៀត។

មន្រ្តីក្រសួងការបរទេសកូរ៉េខាងជើង និយាយថា “ទាំងនេះ គឺជាទង្វើគ្មានការពិចារណានិងគ្រោះថ្នាក់បំផុត ដែលនឹងធ្វើឲ្យខូចតុល្យភាពយុទ្ធសាស្ត្រនៅក្នុងតំបន់អាស៊ីប៉ាស៊ីហ្វិក និងបង្កឲ្យមានការប្រកួតប្រជែងអាវុធនុយក្លេអ៊ែរ”។

កាលពីសប្តាហ៍មុន ប្រទេសកូរ៉េខាងជើងបានធ្វើតេស្តអាវុធធំៗចំនួនពីរ គឺមីស៊ីលផ្លោងរយៈចម្ងាយឆ្ងាយនិងមីស៊ីលបាលីស្ទិក។

ស្របពេលជាមួយគ្នានោះ ប្រទេសចិន ក៏បានរិះគន់កិច្ចព្រមព្រៀងនេះផងដែរ ដោយអ្នកនាំពាក្យក្រសួងការបរទេសក្រុងប៉េកាំង លោក Zhao Lijian បាននិយាយថា សម្ព័ន្ធភាពនេះ គឺជាការប្រថុយប្រថានបំផ្លាញសន្តិភាពក្នុងតំបន់យ៉ាងធ្ងន់ធ្ងរ និងបង្កើនការប្រកួតប្រជែងសព្វាវុធ៕

ប្រែសម្រួល៖ Vann Vann

ប្រភព៖ BBC

ចុចអាន៖ ហេតុអ្វីកិច្ចព្រមព្រៀង AUKUS ក្លាយជាដំណឹងល្អសម្រាប់ ឥណ្ឌា ទៅវិញ?