ហេតុអ្វីកិច្ចព្រមព្រៀង AUKUS ក្លាយជាដំណឹងល្អសម្រាប់ ឥណ្ឌា ទៅវិញ?

ប្រទេសឥណ្ឌា មិនទាន់ចេញការឆ្លើយតបរបស់ខ្លួនចំពោះសេចក្តីប្រកាសភាពជាដៃគូសន្តិសុខត្រីភាគីថ្មី (AUKUS) រវាងអូស្ត្រាលី-អង់គ្លេស-អាមេរិកនៅឡើយទេ ប៉ុន្តែរដ្ឋាភិបាលទីក្រុង ញូវដែលី អាចមានហេតុផលសុទិដ្ឋិនិយម ចំពោះការវិវត្តចុងក្រោយបង្អស់នៅក្នុងសន្តិសុខពិភពលោកនេះ។

កិច្ចព្រមព្រៀងសន្តិសុខត្រីភាគីនេះ នឹងក្លាយជាសារដ៏ធំមួយដល់ប្រទេសចិន។ អ្វីដែលសំខាន់បំផុតគឺថា វានឹងបន្ថែមបន្ទុកលើចិន នៅក្នុងតំបន់។ វានឹងបង្កើនសមត្ថភាពការពាររបស់ប្រទេសអូស្រ្តាលី ដែលជាដៃគូយុទ្ធសាស្ត្រជិតស្និទ្ធរបស់ឥណ្ឌានៅក្នុងតំបន់ឥណ្ឌូ-ប៉ាស៊ីហ្វិក។

កិច្ចព្រមព្រៀងត្រីភាគីថ្មីនេះ ក៏ទំនងជាបង្កើនសមត្ថភាពរបស់ក្រុម Quad ដែលមានអាមេរិកនិងអូស្ត្រាលី ជាសមាជិកផងដែរ។ AUKUS នឹងនាំអូស្រ្តាលីឲ្យទទួលបាននាវាមុជទឹកដើរដោយថាមពលនុយក្លេអ៊ែរជាលើកដំបូង ដោយបង្កើនកម្រិតការពារនៅតំបន់ឥណ្ឌូប៉ាស៊ីហ្វិក។

គួរបញ្ជាក់ថា Quad មិនមែនជាក្រុមសន្តិសុខទេ ដូច្នេះវានាំមកនូវផ្នែកបន្ថែម ដល់ Quad ដែលជាការផ្សព្វផ្សាយការទូតទៅកាន់តំបន់ឥណ្ឌូ-ប៉ាស៊ីហ្វិកដោយប្រទេសប្រជាធិបតេយ្យចំនួន៤។ សម្រាប់ពេលបច្ចុប្បន្ននេះ Quad និង AUKUS នឹងដើរលើផ្លូវស្របគ្នា ហើយមានលទ្ធភាពថា នៅពេលអនាគត ក្រុមទាំងពីរអាចច្របាច់បញ្ចូលគ្នាបាន។

នាយករដ្ឋមន្រ្តីអូស្រ្តាលី លោក Scott Morrison បានសរសេរនៅលើបណ្តាញសង្គម Twitter ថា “ថ្ងៃនេះ អូស្ត្រាលីចាប់ផ្តើមភាពជាដៃគូសន្តិសុខត្រីភាគីជាមួយអង់គ្លេសនិងអាមេរិក​ ដើម្បីបង្កើនកិច្ចសហប្រតិបត្តិការកាន់តែស៊ីជម្រៅ លើសមត្ថភាពសន្តិសុខនិងការពារជាតិ។ នេះគឺជាឱកាសប្រវត្តិសាស្ត្រ សម្រាប់ប្រទេសរបស់យើងក្នុងការពង្រឹងសន្តិសុខជាតិរបស់យើងក្នុងពេលវេលាមិនច្បាស់លាស់”។

ស្របពេលជាមួយគ្នានោះ លោក Ashley Tellis សមាជិកជាន់ខ្ពស់នៅវិទ្យាស្ថាន Carnegie បានប្រាប់គេហទំព័រ Times Of India ថា “កិច្ចព្រមព្រៀង AUKUS មានគោលបំណងបង្កើតសមត្ថភាពអូស្ត្រាលី ដើម្បីទប់ទល់កម្លាំងយោធារបស់ចិន។ នាវាមុជទឹកដើរដោយនុយក្លេអ៊ែរគឺជាសន្លឹកអាត់ ពួកគេផ្តោតលើភាពងាយរងគ្រោះធំបំផុតរបស់ចិន។ ដូច្នេះវាគឺជាការវិនិយោគដ៏អស្ចារ្យមួយ៕

ប្រែសម្រួល៖ Vann Vann

ប្រភព៖ TOI

ចុចអាន៖ បារាំង ថា កិច្ច ព្រម ព្រៀង ការពារជាតិ អាមេរិក អង់គ្លេស និងអូស្ត្រាលី ដូច ចាក់ ពី ក្រោយ ខ្នង