ព័ត៌មានលម្អិតរបស់អ្នកបកប្រែជនជាតិអាហ្វហ្គានីស្ថាន ត្រូវ អង់គ្លេស ច្រឡំដៃទម្លាយខ្ទេចគ្មានសល់

កាលពីថ្ងៃអង្គារទី២១ខែកញ្ញា ចក្រភពអង់គ្លេស បានសុំទោសចំពោះការលេចធ្លាយទិន្នន័យ ​ដែលបង្ហាញព័ត៌មានលម្អិតអំពីជនជាតិអាហ្វហ្គានីស្ថាន ដែលកំពុងស្វែងរកការជ្រកកោននៅប្រទេសអង់គ្លេស បន្ទាប់ពីក្រុមតាលីបង់ ឡើងកាន់កាប់ប្រទេសនេះជាថ្មី នៅពេលកងទ័ពបរទេស ដកចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចក្រភពអង់គ្លេស សហរដ្ឋអាមេរិកនិងសមាជិកអង្គការសន្ធិសញ្ញាអាត្លង់ទិកខាងជើង (ណាតូ) ផ្សេងទៀត បានប្រញាប់ប្រញាល់ជម្លៀសជនជាតិរបស់ខ្លួន និងអ្នកផ្សេងទៀត ដែលបានធ្វើការឲ្យពួកគេ បន្ទាប់ពីក្រុមតាលីបង់ដណ្តើមបានការគ្រប់គ្រងទីក្រុងកាប៊ុល លឿនជាងការរំពឹងទុក។

រដ្ឋមន្រ្តីក្រសួងការពារជាតិអង់គ្លេសលោក Ben Wallace បាននិយាយថា អ៊ីមែលពីគោលនយោបាយជំនួយ ការផ្លាស់ប្តូរទីលំនៅជនជាតិអាហ្វហ្គានីស្ថានរបស់ចក្រភពអង់គ្លេស ដែលជាគម្រោងត្រូវបានប្រើដើម្បីជួយអ្នកបកប្រែនិងអ្នកផ្សេងទៀតដែលធ្វើការឲ្យអង់គ្លេស បានបង្ហាញព័ត៌មានលម្អិតអំពីអ្នកធ្វើការជាង ២៥០នាក់។

លោក Wallace និយាយថា លោកមានការសោកស្តាយ ហើយកំពុងបើកការស៊ើបអង្កេត។ លោកបន្តថា “ខ្ញុំសូមអភ័យទោសចំពោះជនជាតិអាហ្វហ្គានីស្ថាន ដែលរងផលប៉ះពាល់ដោយការលេចធ្លាយទិន្នន័យនេះ ហើយយើងកំពុងធ្វើការ ដើម្បីផ្តល់ដំបូន្មានសន្តិសុខ”។

ស្របពេលជាមួយគ្នានោះដែរ ក្រុមអ្នកតាក់តែងច្បាប់បានឆ្លើយតបទៅលោក Wallace ដោយនិយាយថា ការលាតត្រដាងនេះ បានធ្វើឲ្យជីវិតរបស់អ្នកដែលមានឈ្មោះក្នុងបញ្ជី ស្ថិតក្នុងគ្រោះថ្នាក់ ព្រោះក្រុមតាលីបង់ ប្រហែលជាអាចកំណត់អត្តសញ្ញាណ ហើយដាក់ទណ្ឌកម្មពួកគេចំពោះការជួយដល់កងកម្លាំងលោកខាងលិច៕

ប្រែសម្រួល៖ Vann Vann

ប្រភព៖ Reuters

ចុចអាន៖ តាលីបង់ បញ្ជាក់ច្បាស់ៗ គ្មានវត្តមានក្រុមអាល់កៃដានៅ អាហ្វហ្គានីស្ថាន ឡើយក្រោយ អាមេរិក ចោទថាកំពុងផ្ដល់ជម្រកដល់ភេរវករមួយនេះ