ព័ត៌មានអន្ដរជាតិ

អាមេរិកនៅមានរដ្ឋ១៨ចាក់វ៉ាក់សាំងដល់ពលរដ្ឋមិនទាន់បានពាក់កណ្តាល

បានផុស

៥ years មុន

នៅ

ថ្ងៃចន្ទ ២៧ កញ្ញា ២០២១

ដោយ

ការឆ្លងកូវីដ-១៩ និងការចូលព្យាបាលនៅមន្ទីរពេទ្យថ្មីចេះតែកើនឡើងជាលំដាប់ មន្ត្រីសុខាភិបាល និងថ្នាក់ដឹកនាំរដ្ឋបានកំពុងជំរុញឲ្យសាធារណជនទៅចាក់វ៉ាក់សាំងឲ្យបានមុនពេលរដូវត្រជាក់មកដល់ ខណៈមជ្ឈមណ្ឌលគ្រប់គ្រង និងបង្ការជំងឺឆ្លង (CDC) អាមេរិកបានអនុម័តឲ្យមានការចាក់វ៉ាក់សាំងជំរុញបន្ថែមសម្រាប់ចំនួនប្រជាជនអាមេរិក។

យោងតាមទិន្នន័យ CDC បានបង្ហាញថា ទោះបីជាមានការអំពាវនាវយ៉ាងណាក៏ដោយ ក៏អត្រាចាក់វ៉ាក់សាំងជាមធ្យមបានធ្លាក់ចុះ។

ប្រជាជនអាមេរិកប្រហែលជា៥៥%ប៉ុណ្ណោះដែលឥឡូវនេះបានចាក់វ៉ាក់សាំងបង្ការកូវីដ-១៩ពេញដូសដែលជាវិធីសាស្ត្រដ៏ជាប់លាប់ដើម្បីប្រឆាំងនឹងកូវីដ-១៩។ ប៉ុន្តែការទទួលយកការចាក់វ៉ាក់សាំងនៅតែមានកម្រិតតាមតំបន់ជាច្រើនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការវិភាគថ្មីៗរបស់ CNN បង្ហាញថា អត្រាស្លាប់ដោយកូវីដ-១៩ជាមធ្យមនៅក្នុងរដ្ឋចំនួន១០ដែលបានចាក់វ៉ាក់សាំងទាបបំផុតគឺខ្ពស់ជាងរដ្ឋចំនួន១០ដែលបានចាក់វ៉ាក់សាំងខ្ពស់បំផុត១០រដ្ឋដល់ទៅ៤ដងកាលពីសប្តាហ៍មុន។

យោងតាមទិន្នន័យរបស់ CDC បង្ហាញថា រដ្ឋ Utah កាលពីថ្ងៃព្រហស្បតិ៍បានក្លាយជារដ្ឋទី៣២ដែលបានចាក់វ៉ាក់សាំងពេញដូសដល់ប្រជាជនរបស់ខ្លួនបានពាក់កណ្តាល។

ទិន្នន័យបង្ហាញថា នៅមានរដ្ឋចំនួន១៨ទៀតដែលមិនទាន់បានចាក់វ៉ាក់សាំងពេញដូសដល់ប្រជាជនរបស់ខ្លួនបានពាក់កណ្តាលឡើយ។ រដ្ឋទាំងនោះរួមមាន Alabama, Alaska, Arkansas, Georgia, Idaho, Indiana, Louisiana, Mississippi, Missouri, Montana, North Carolina, North Dakota, Ohio, Oklahoma, South Carolina, Tennessee, West Virginia និង រដ្ឋ Wyoming។

ចំពោះរដ្ឋដែលមានអត្រាចាក់វ៉ាក់សាំងខ្ពស់ជាងបំផុតគឺ Vermont ដែលបានចាក់វ៉ាក់សាំងពេញដូសដល់ប្រជាជនរបស់ខ្លួនដល់៦៩% បន្ទាប់មកមានរដ្ឋ Connecticut, Rhode Island, Massachusetts និង New Jersey។

អត្រាចាក់វ៉ាក់សាំងខុសគ្នាបានកំពុងជះឥទ្ធិពលដល់ការឆ្លងឈឺចូលព្យាបាលនៅមន្ទីរពេទ្យ និងស្លាប់។

យោងតាមការិយាល័យរបស់អភិបាលរដ្ឋលោក Mark Gordon បង្ហាញថា រដ្ឋ Wyoming នឹងកាន់តែខិតជិតឃើញកំណត់ត្រាថ្មីនៃអ្នកជំងឺកូវីដ-១៩ចូលមន្ទីរពេទ្យ ហើយកាលពីថ្ងៃអង្គារ៍ រដ្ឋបានចាត់បុគ្គលិកជិត១០០នាក់ឲ្យទៅជួយធ្វើតេស្ត ត្រួតពិនិត្យ និងកិច្ចការផ្សេងៗដល់មន្ទីរពេទ្យមួយចំនួននៅក្នុងតំបន់។

យោងតាមអភិបាលរដ្ឋលោក Jim Justice បានឲ្យដឹងថា រដ្ឋ West Virginia នៅសប្តាហ៍នេះបានជាប់កំណត់ត្រាថ្មីនៃអ្នកជំងឺកូវីដចូលពេទ្យខ្ពស់បំផុតដល់ទៅ១០០០នាក់៕

ប្រែសម្រួល៖ វីរបុត្រ
ប្រភព៖ CNN