ជប៉ុន អនុម័តថ្នាំមួយទៀតព្យាបាលអ្នកឆ្លងកូវីដមិនធ្ងន់ធ្ងរ ឯប្រសិទ្ធភាពបន្ថយ ការស្លាប់មានដល់ ៧៩ ភាគរយ

ក្រសួងសុខាភិបាលជប៉ុនបានអនុម័តថ្នាំមួយទៀតសម្រាប់ព្យាបាលអ្នកឆ្លងកូវីដមិនធ្ងន់ធ្ងរ ហើយវានឹងក្លាយជាថ្នាំទី ២ នៅក្នុងប្រទេសដែលបានផ្តល់ភ្លើងខៀវ បន្ទាប់ពីថ្នាំផ្សុំជួយបង្កើនអង់ទីគ័រ ឬហៅថា Antibody Cocktail ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបានអនុម័តថ្នាំ Sotrovimab ផលិតដោយក្រុមហ៊ុនឱសថចក្រភពអង់គ្លេស GlaxoSmithKline កាលពីល្ងាចថ្ងៃចន្ទ ក្រោយក្រុមអ្នកជំនាញរបស់ក្រសួងបានវាយតម្លៃ និងទទួលស្គាល់ពីប្រសិទ្ធភាព និងសុវត្ថិភាពនៃថ្នាំនេះ ។

ទន្ទឹមនោះ អ្នកជំងឺដែលមានរោគសញ្ញាស្រាលទៅមធ្យមដែលមិនត្រូវការអុកស៊ីសែន ប៉ុន្តែមានហានិភ័យខ្ពស់ក្នុងការវិវត្តទៅជាជំងឺធ្ងន់ធ្ង គឺមានសិទ្ធិទទួលបានការប្រើថ្នាំនេះ ។

ស្របពេលជាមួយគ្នានេះ ការសាកល្បងព្យាបាលដែលធ្វើឡើងនៅក្រៅប្រទេសបានបង្ហាញថា ថ្នាំនេះកាត់បន្ថយហានិភ័យនៃការចូលមន្ទីរពេទ្យ ឬស្លាប់ ៧៩ ភាគរយ ខណៈកាលពីខែឧសភា រដ្ឋបាលចំណីអាហារ និងឱសថអាមេរិក (FDA) បានចេញការអនុញ្ញាតសម្រាប់ថ្នាំនេះឲ្យប្រើប្រាស់ជាបន្ទាន់ហើយផងដែរ ។

គួរបញ្ជាក់ថា ថ្នាំ Sotrovimab គឺជាថ្នាំបន្សាបអង់ទីគ័រដែលធ្វើឲ្យជំងឺកូវីដ ១៩ ចុះខ្សោយ ហើយថ្នាំនេះត្រូវបានគេប្រើចាក់បញ្ចូលតាមសរសៃឈាម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ឆ្នាំក្រោយ ពិភពលោក មានថ្នាំព្យាបាលកូវីដហើយ!