អ៊ីស្រាអែល ហាមឃាត់អ្នកមិនចាក់វ៉ាក់សាំងដូសជំរុញ អត់ឲ្យមានសេរីភាព ដើរហើរទូលំទូលាយ

រដ្ឋាភិបាលអ៊ីស្រាអែល បានហាមឃាត់អ្នកណាដែលមិនចាក់វ៉ាក់សាំងកូវីដដូសជំរុញ មិនឲ្យចូលកន្លែងបិទជិត ពោលលែងបើកសេរីភាពទូលំទូលាយដូចមុនទៀតហើយចំពោះអ្នកចាក់ថ្នាំបង្ការបាន ២ ដូស ដែលនេះមានន័យថា មនុស្សជិត២លាននាក់ នឹងបាត់បង់លិខិតវ៉ាក់សាំងរបស់ពួកគេ ក្នុងរយៈពេលប៉ុន្មានថ្ងៃខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល បានក្លាយជាប្រទេសដំបូងគេនៅលើពិភពលោក ដែលទាមទារឲ្យការចាក់វ៉ាក់សាំងដូសជំរុញ ក្លាយជាតម្រូវការសម្រាប់លិខិតវ៉ាក់សាំងឌីជីថលរបស់ខ្លួន ដែលជាសកម្មភាពមួយត្រូវបានគេមើលឃើញថា ជាវិធានការដើម្បីលើកទឹកចិត្តប្រជាជនឲ្យទទួលថ្នាំបង្ការដូសទី៣។

បញ្ហាបច្ចេកទេស បានរារាំងក្រសួងសុខាភិបាលចំពោះការចេញប័ណ្ណបៃតងដែលធ្វើបច្ចុប្បន្នភាព ខណៈមនុស្សរាប់លាននាក់ព្យាយាមបញ្ជាក់ឡើងវិញនូវឯកសារឌីជីថល ដែលអាចអនុញ្ញាតឲ្យចូលហាង ភោជនីយដ្ឋាន ព្រឹត្តិការណ៍វប្បធម៌និងកន្លែងហាត់ប្រាណ។

ប្រជាជនអ៊ីស្រាអែលជាច្រើននាក់ បានធ្វើបាតុកម្មនៅទូទាំងប្រទេស ដើម្បីប្រឆាំងនឹងប្រព័ន្ធប័ណ្ណបៃតងនេះខណៈ អ្នកប្រឆាំងប្រព័ន្ធនេះបានចាត់ទុក វិធានការនេះថា ជាទម្រង់នៃការចាក់វ៉ាក់សាំងដោយបង្ខំ។

គួរបញ្ជាក់ថា ប្រជាជនអ៊ីស្រាអែលជាង ៦០ ភាគរយ បានទទួលវ៉ាក់សាំង Pfizer/BioNTech ចំនួន ២ ដូស ហើយប្រជាពលរដ្ឋជិត ៣.៥ លាននាក់ក្នុងចំណោមប្រជាជន ៩.៣ លាននាក់របស់ខ្លួន បានទទួលវ៉ាក់សាំងដូសជំរុញ។

ប៉ុន្មានខែចុងក្រោយនេះ មានការកើនឡើងនៃករណីកូវីដថ្មីនៅអ៊ីស្រាអែល។ គិតត្រឹមថ្ងៃអាទិត្យ ជាង ៧០ ភាគរយនៃករណីធ្ងន់ធ្ងរចំនួន ៥៨៨ នៅក្នុងមន្ទីរពេទ្យអ៊ីស្រាអែល គឺពាក់ព័ន្ធនឹងបុគ្គលដែលមិនបានចាក់វ៉ាក់សាំង៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្រុមហ៊ុនឱសថ BioNTech ចាប់ផ្ដើមសាកល្បងវ៉ាក់សាំងការពារជំងឺសាហាវបំផុតទី ២ លើលោក