មេក្រុមហ៊ុន BioNTech ថា រូបមន្តផលិតវ៉ាក់សាំងការពារវីរុសបំប្លែងខ្លួន អាចខុសទម្រង់ដើម

លោក Ugur Sahin សហស្ថាបនិក និងជានាយកប្រតិបត្តិក្រុមហ៊ុនឱសថ BioNTech បានប្រាប់កាសែត Financial Times នៅក្នុងបទសម្ភាសន៍ថ្មីៗនេះថា ទោះបីជាមានវីរុសបំប្លែងខ្លួនដូចជា Delta ដែលអាចចម្លងបានយ៉ាងរហ័សក៏ដោយ ក៏ទំនងជាមិនធ្វើឲ្យប៉ះពាល់ដល់រូបមន្តផលិតវ៉ាក់សាំងដើមនោះដែរ ។

លោក Sahin បានប្រាប់សារព័ត៌មាននេះថា “ឆ្នាំនេះវ៉ាក់សាំងផ្សេងមិនត្រូវការទាំងស្រុងនោះទេ ប៉ុន្តែនៅពាក់កណ្តាលឆ្នាំក្រោយវាអាចជាស្ថានភាពផ្សេង ហើយរូបមន្តវ៉ាក់សាំងថ្មីអាចនឹងត្រូវការ ។ នេះគឺជាការវិវត្តឥតឈប់ឈរ ហើយការវិវត្តនោះទើបតែចាប់ផ្តើមប៉ុណ្ណោះ” ។

ក្រុមហ៊ុនឱសថ BioNTech មានមូលដ្ឋាននៅប្រទេសអាល្លឺម៉ង់ ដែលបានបង្កើតវ៉ាក់សាំងការពារជំងឺកូវីដ ១៩ ជាមួយក្រុមហ៊ុនឱសថអាមេរិក Pfizer ថ្មីៗនេះបានបញ្ជូនទិន្នន័យទៅនិយតករអាមេរិក ទាក់ទងនឹងការប្រើប្រាស់វ៉ាក់សាំងរបស់ខ្លួន ចំពោះកុមារដែលមានអាយុពី ៥ ទៅ ១១ ឆ្នាំ ។

កន្លងមកវ៉ាក់សាំង Pfizer-BioNTech មានការការពារដ៏ល្អបំផុតប្រឆាំងនឹងវីរុសបំប្លែងខ្លួន ប៉ុន្តែក្រោយមកការស្រាវជ្រាវទាក់ទងនឹងវ៉ាក់សាំងមួយនេះហាក់ដូចជាបង្ហាញថា អ្នកចូលរួមមានការថយចុះអង់ទីគ័រគួរឲ្យកត់សម្គាល់ជិត ១០ ដង ក្នុងរយៈពេល ៧ ខែ បន្ទាប់ពីចាក់ដូសទី ២ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ក្រុមហ៊ុនឱសថ BioNTech ចាប់ផ្ដើមសាកល្បងវ៉ាក់សាំងការពារជំងឺសាហាវបំផុតទី ២ លើលោក