អ៊ីស្រាអែល បង្កើតវិធីថ្មីប្រើបច្ចេកវិទ្យា AI សម្រាប់ព្យាបាលជំងឺមួយនេះ

សាកលវិទ្យាល័យ Bar Ilan (BIU) នៅកណ្តាលប្រទេសអ៊ីស្រាអែលបាននិយាយកាលពីថ្ងៃអាទិត្យថា អ្នកស្រាវជ្រាវជនជាតិអ៊ីស្រាអែលបានបង្កើតវិធីសាស្រ្តថ្មីមួយដែលរួមបញ្ចូលជីវវិទ្យា និងបច្ចេកវិទ្យា AI ដើម្បីព្យាបាលជំងឺមហារីកឈាម (Leukemia) ។

BIU កត់សម្គាល់ថា ការព្យាបាលនេះផ្តោតលើការបំផ្លាញកោសិកាមហារីក ហើយមិនបង្កគ្រោះថ្នាក់ដល់សុខភាពឡើយ ។

នៅក្នុងការសិក្សាមួយដែលត្រូវបានបោះពុម្ពផ្សាយដោយទស្សនាវដ្តី Nature Communications បានឲ្យដឹងថា អ្នកស្រាវជ្រាវ BIU បានប្រើការម៉ាស៊ីនដើម្បីកំណត់ម៉ូលេគុលតូចៗដែលអាចបំផ្លាញប្រូតេអ៊ីន Actin នៅក្នុងកោសិកាមហារីក ព្រោះប្រូតេអ៊ីន Actin មានសារៈសំខាន់សម្រាប់កោសិកាមហារីកឲ្យសកម្ម រីកលូតលាស់ និងរីករាលដាល។

ទន្ទឹមនោះ អ្នកស្រាវជ្រាវផ្តោតលើការរកឃើញ និងបំផ្លាញប្រូតេអ៊ីន WASp ដែលគ្រប់គ្រងប្រូតេអ៊ីន Actin នៅក្នុងកោសិកាមហារីក ។

ពួកគេបានសាកល្បងដំណើរការនេះដោយជោគជ័យនៅក្នុងមន្ទីរពិសោធន៍លើកោសិកាដែលយកចេញពីអ្នកជំងឺ និងលើសត្វកណ្តុរដោយសហការជាមួយមជ្ឈមណ្ឌលវេជ្ជសាស្ត្រ Sheba នៅកណ្តាលប្រទេសអ៊ីស្រាអែល ។

អ្នកស្រាវជ្រាវបានកត់សម្គាល់ថា នៅក្នុងវិធីព្យាបាលថ្មីនេះម៉ូលេគុលតូចៗអាចត្រូវបានផ្តល់ឲ្យអ្នកជំងឺដោយការចាក់បញ្ចូលតាមសរសៃឈាម ឬដោយការលេប ។

ជាចុងក្រោយពួកគេបានសន្និដ្ឋានថា វិធីសាស្រ្តថ្មីនេះអាចជំនួសការព្យាបាលដោយប្រើគីមី និងការព្យាបាលជីវសាស្រ្តដទៃទៀតដែលអាចបំផ្លាញកោសិកាដទៃទៀតនៅក្នុងរាងកាយ និងបណ្តាលឲ្យកោសិកាមហារីកធន់ចំពោះការព្យាបាល ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ អ៊ីស្រាអែល ចាប់ផ្តើមធ្វើតេស្តរកកូវីដតាមទឹកមាត់ លទ្ធផលមិនចាញ់ម៉ាស៊ីន PCR