អាស៊ាន ពិភាក្សា ដកមេដឹកនាំមីយ៉ាន់ម៉ា ចេញពីកិច្ចប្រជុំកំពូល

ក្នុងជំនួបមួយ រដ្ឋមន្រ្តីការបរទេសអាស៊ីអាគ្នេយ៍ បានពិភាក្សាអំពីការដកប្រមុខយោធាមីយ៉ាន់ម៉ា លោក Min Aung Hlaing ពីកិច្ចប្រជុំកំពូលប្រចាំតំបន់នាពេលខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះបានកើតឡើង ចំពេលយោធាមីយ៉ាន់ម៉ា បដិសេធអនុញ្ញាតឲ្យបេសកជនក្នុងតំបន់ចូលទៅជួបជាមួយមេដឹកនាំធ្លាក់តំណែងគឺលោកស្រី អ៊ុងសាន ស៊ូជី ដែលកំពុងត្រូវបានជំនុំជម្រះក្តី លើការចោទប្រកាន់ជាច្រើន ចាប់តាំងពីរដ្ឋាភិបាលជាប់ឆ្នោតរបស់លោកស្រីត្រូវបានផ្តួលរំលំនៅក្នុងរដ្ឋប្រហារថ្ងៃទី ១ ខែកុម្ភៈ។

សមាគមប្រជាជាតិអាស៊ីអាគ្នេយ៍ (អាស៊ាន) បានយល់ព្រមលើការមូលមតិគ្នាចំនួន ៥ ចំណុចជាមួយលោក Min Aung Hlaing កាលពីខែមេសា ប៉ុន្តែសមាជិកមួយចំនួននៃប្លុកនេះ បានរិះគន់ការខកខានរបស់យោធា ក្នុងការអនុវត្តផែនការនេះ ដែលរួមបញ្ចូលទាំងការសន្ទនាគ្នាជាមួយគ្រប់ភាគី, ការចូលទៅក្នុងប្រទេសក្នុងលក្ខខណ្ឌមនុស្សធម៌និង បញ្ចប់អរិភាពផងដែរ។

កិច្ចប្រជុំតាមអនឡានដែលមិនបានគ្រោងទុកនេះ ត្រូវរៀបចំឡើងដោយប្រធានអាស៊ាន គឺប្រទេស ព្រុយណេ។

ប្រទេសម៉ាឡេស៊ី សិង្ហបុរី និងឥណ្ឌូណេស៊ីបានបង្ហាញថា ពួកគេពេញចិត្តក្នុងការដកលោក Min Aung Hlaing ចេញពីកិច្ចប្រជុំកំពូលនៅថ្ងៃទី ២៦ ដល់ថ្ងៃទី ២៨ ខែតុលា ប៉ុន្តែបានជំរុញឲ្យមានការឯកភាពគ្នាក្នុងចំណោមរដ្ឋអាស៊ានចំនួន៩ទៀត។

ទន្ទឹមនោះ រដ្ឋមន្ត្រីការបរទេសហ្វីលីពីនលោក Teodoro Locsin បានសម្តែងការគាំទ្រចំពោះការដកលោក Min Aung Hlaing ចេញពីកិច្ចប្រជុំកំពូលនាពេលអនាគត ដោយបន្ថែមថា អាស៊ានលែងមានលទ្ធភាពប្រកាន់ជំហរអព្យាក្រឹត្យលើប្រទេសមីយ៉ាន់ម៉ាទៀតហើយ។

ទោះបីជាយ៉ាងណាក៏ដោយ អ្នកនាំពាក្យយោធាមីយ៉ាន់ម៉ាលោក Zaw Min Tun មិនបានឆ្លើយតបនឹងការហៅទូរស័ព្ទសុំការអត្ថាធិប្បាយអំពីកិច្ចប្រជុំនេះបានទេ ហើយ ក្រសួងការបរទេសព្រុយណេ ក៏មិនបានឆ្លើយតបភ្លាមៗចំពោះសំណើតាមអ៊ីមែល សុំការអត្ថាធិប្បាយដែរ៕

ប្រែសម្រួល៖ Vann Vann

ប្រភព៖ CNA

ចុចអាន៖ បណ្ដា ប្រទេស អាស៊ាន អបអរសាទរ និង កោតសរសើរ កម្ពុជា ក្រោយ ធ្វើ ហេដ្ឋារចនាសម្ព័ន្ធ ហើយ មុន SEA Games-ASEAN Para Games 2023