ព័ត៌មានអន្ដរជាតិ

បេសកជនពិសេសអាមេរិកនៅអាហ្វហ្គានីស្ថានលាឈប់ ក្រោយដកទ័ពមិនដល់ពីរខែ

បានផុស

៥ years មុន

នៅ

ថ្ងៃអង្គារ ១៩ តុលា ២០២១

ដោយ

បេសកជនកំពូលរបស់សហរដ្ឋអាមេរិកប្រចាំប្រទេសអាហ្វហ្គានីស្ថានបានចុះចេញពីតំណែងក្នុងរយៈពេលមិនដល់ពីរខែផង បន្ទាប់ពីកម្លាំងទ័ពអាមេរិកបានដកចេញពីប្រទេសមួយនេះ។

លោក Zalmay Khalilzad បានដឹកនាំការចរចារបស់អាមេរិកជាមួយតាលីបង់ ប៉ុន្តែប៉ុន្មានខែនៃកិច្ចពិភាក្សាការទូតបានបរាជ័យក្នុងការរារាំងក្រុមសកម្មប្រយុទ្ធពីការដណ្តើមអំណាច។ តាលីបង់បានគ្រប់គ្រងអាហ្វហ្គានីស្ថានកាលពីខែសីហា បន្ទាប់ពីចូលកាន់កាប់រដ្ឋធានីកាប៊ុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងការបរទេសអាមេរិក លោក Antony Blinken បានឲ្យដឹងថា បេសកជនរងរបស់លោក Khalilzad គឺលោក Thomas West នឹងទទួលតួនាទីបន្ត។

លោក Blinken មានប្រសាសន៍ក្នុងសេចក្តីប្រកាសពីការលាឈប់របស់លោក Khalilzad កាលពីថ្ងៃចន្ទថា ៖«ខ្ញុំសូមថ្លែងអំណគុណចំពោះការបំពេញតួនាទីរបស់លោករាប់ទសវត្សរ៍ដល់ពលរដ្ឋអាមេរិក»។

នៅក្នុងលិខិតលាឈប់ទៅកាន់លោក Blinken, លោក Khalilzad បានទទួលស្គាល់ថា ការរៀបចំនយោបាយរវាងរដ្ឋាភិបាលអាហ្វហ្គានីស្ថាន និងតាលីបង់មិនបានដំណើរការទៅមុខតាមការគ្រោងទុកទេ។

លោកបានសរសេរថា ៖«ហេតុផលសម្រាប់បញ្ហានេះស្មុគស្មាញខ្លាំង ហើយខ្ញុំនឹងផ្តល់គំនិតរបស់ខ្ញុំនៅថ្ងៃ និងសប្តាហ៍ខាងមុខ»។ លោកនិយាយថា លោកបានកំពុងឆ្ពោះទៅមុខ ខណៈពេលអាមេរិកបានចូលទៅក្នុងដំណាក់កាលថ្មីនៃនយោបាយអាហ្វហ្គានីស្ថាន។ លោកមានការសោកស្តាយចំពោះពលរដ្ឋអាហ្វហ្គានីស្ថានដែលទទួលរងលទ្ធផលបច្ចុប្បន្ននេះ។

លោក Khalilzad អាយុ៧០ឆ្នាំបានកើតនៅប្រទេសអាហ្វហ្គានីស្ថាន និងធំដឹងក្តីនៅរដ្ឋធានីកាប៊ុល។ លោកជាអ្នកការទូតអាមេរិកជើងចាស់ម្នាក់ដែលបានកាន់តួនាទីជាច្រើនក្រោមអាណត្តិប្រធានាធិបតី George W Bush, បារ៉ាក់ អូបាម៉ា, ដូណាល់ ត្រាំ និង ចូ បៃដិន។

លោកបានដឹកនាំគណប្រតិភូអាមេរិកចរចាជាមួយតាលីបង់ដែលឈានទៅដល់ចុះកិច្ចព្រមព្រៀងទីក្រុងដូហាកាលពីខែកុម្ភៈ ឆ្នាំមុនដែលកំណត់កាលបរិច្ឆេទសម្រាប់សហរដ្ឋអាមេរិកដកកងទ័ពចេញពីប្រទេសអាហ្វហ្គានីស្ថាន៕

ប្រែសម្រួល៖ វីរបុត្រ
ប្រភព៖ BBC