កំពុងតានតឹងជាមួយអាមេរិក ស្រាប់តែ ចិន និងរុស្ស៊ី ចេញល្បាតរួមគ្នាក្នុងមហាសមុទ្រ ប៉ាស៊ីហ្វិក

ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ទី ២៣ ខែតុលាថា នាវាចម្បាំងរុស្ស៊ីនិងចិន បានធ្វើការល្បាតរួមគ្នាជាលើកដំបូងនៅផ្នែកខាងលិចនៃមហាសមុទ្រប៉ាស៊ីហ្វិក ចាប់ពីថ្ងៃទី ១៧ ដល់ថ្ងៃទី ២៣ ខែតុលា។

ទីក្រុងមូស្គូនិង ប៉េកាំង ដែលបានធ្វើសមយុទ្ធកិច្ចសហប្រតិបត្តិការកងទ័ពជើងទឹកនៅសមុទ្រជប៉ុនកាលពីដើមខែតុលានេះ បានបង្កើតទំនាក់ទំនងយោធានិងការទូតកាន់តែជិតស្និទ្ធក្នុងរយៈពេលប៉ុន្មានឆ្នាំចុងក្រោយ ចំពេលទំនាក់ទំនងរបស់ពួកគេជាមួយបស្ចិមប្រទេសមានភាពតានតឹង។

សមយុទ្ធកងទ័ពជើងទឹកនោះ ត្រូវបានឃ្លាំមើលយ៉ាងដិតដល់ដោយប្រទេសជប៉ុន ហើយទីក្រុងតូក្យូបាននិយាយកាលពីដើមសប្តាហ៍នេះថា នាវាមួយក្រុម មាន១០គ្រឿង មកពីប្រទេសចិន និងរុស្ស៊ី បានធ្វើដំណើរឆ្លងកាត់ច្រកសមុទ្រ Tsugaru ដែលពុះចែកកោះសំខាន់របស់ប្រទេសជប៉ុន និងកោះភាគខាងជើង Hokkaido។

ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍ថា “ក្រុមនាវា បានឆ្លងកាត់ច្រកសមុទ្រ Tsugaru ជាលើកដំបូងដែលជាផ្នែកមួយនៃការល្បាត”។

ការល្បាតនេះ គឺបង្ហាញពីភារកិច្ចរបស់រុស្ស៊ីនិងចិន ក្នុងការរក្សាសន្តិភាពនិងស្ថិរភាពនៅក្នុងតំបន់អាស៊ីប៉ាស៊ីហ្វិក និងការការពារប្រធានបទនៃសកម្មភាពសេដ្ឋកិច្ចសមុទ្រនៃប្រទេសទាំងពីរ។

គួរបញ្ជាក់ថា ច្រកសមុទ្រនោះ ត្រូវបានគេចាត់ទុកថាជាដែនទឹកអន្តរជាតិ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន ធ្វើសមយុទ្ធយោធាជិតព្រំដែន តៃវ៉ាន់ ព្រមានបរទេសកុំហ៊ានជ្រៀតជ្រែកកោះនេះ