អ្នកទោសថៃ ជាង ១ពាន់នាក់ កើតកូវីដ តែមិនដឹងឆ្លងពីណា

អ្នកទោសជាង១,០០០នាក់នៅក្នុងពន្ធនាគារខេត្ត Nakhon Si Thammarat ភាគខាងត្បូងប្រទេសថៃ បានឆ្លងមេរោគកូវីដ-១៩ ដោយក្នុងនោះមាន ៣៩៦នាក់ចេញរោគសញ្ញា។

មន្ត្រីពន្ធនាគារបានប្រាប់គេហទំព័រ Thai PBS ថា ពួកគេមិនដឹងថាតើការឆ្លងនេះ បានចាប់ផ្តើមដោយរបៀបណានោះទេ ប៉ុន្តែនិយាយថា មានតែមន្ត្រីប៉ុណ្ណោះ ដែលត្រូវបានអនុញ្ញាតឲ្យចូលទៅក្នុងផ្នែកទី៦ ដែលជាកន្លែងដាក់អ្នកទោសជាប់ពន្ធនាគារយ៉ាងតិច៣០ឆ្នាំ និងអ្នកមានទោសប្រហារជីវិត។

ដើម្បីទប់ស្កាត់ការរីករាលដាលបន្ថែមទៀតក្នុងចំណោមអ្នកទោស អគារបណ្តុះបណ្តាលវិជ្ជាជីវៈកំពុងត្រូវបានប្រើប្រាស់ជាកន្លែងធ្វើចត្តាឡីស័ក និងព្យាបាលអ្នកទោសដែលមានរោគសញ្ញាជាមួយថ្នាំ Favipiravir និងឱសថបុរាណថៃ Fah Talai Jone ខណៈអ្នកទោសដែលមានហានិភ័យទាប កំពុងត្រូវបានដាក់នៅដាច់ដោយឡែកពីគ្នា។

ការទៅសួរសុខទុក្ខសាច់ញាតិ ឬជនដែលគ្មានការអនុញ្ញាត ត្រូវបានហាមឃាត់។

ទន្ទឹមនឹងនេះ នៅក្នុងខេត្ត Trang ភាគខាងត្បូង ពន្ធនាគារខេត្តត្រូវបានបាញ់ថ្នាំសម្លាប់មេរោគ  បន្ទាប់ពីអ្នកទោសថ្មីចំនួន ១៦៣នាក់ ត្រូវបានរកឃើញថាបានឆ្លងវីរុសកូវីដ-១៩៕

ប្រែសម្រួល៖ Vann Vann

ប្រភព៖ Thai PBS

ចុចអាន៖ ខេត្ត ថៃ ចំនួន២ ជាប់ កម្ពុជា រកឃើញអ្នកឆ្លងកូវីដបំប្លែងខ្លួន មិនខ្លាចវ៉ាក់សាំង