អាមេរិក និង ចិន នៅតែបដិសេធមិនបញ្ចប់ការខួងយកប្រេង និងឧស្ម័ន

កិច្ចខិតខំប្រឹងប្រែងដើម្បីបញ្ចប់ការខួងយកប្រេង និងឧស្ម័នកំពុងទទួលបានភាពទាក់ទាញនៅឯសន្និសីទកិច្ចប្រជុំ​កំពូល​ស្តីពី​អាកាសធាតុ COP26 របស់ UN នៅចក្រភពអង់គ្លេស ខណៈរដ្ឋាភិបាលចំនួន ១០ បានចូលរួមជាមួយសម្ព័ន្ធអន្តរជាតិថ្មីមួយ ដែលមានបំណងបញ្ចប់ការផលិតនៅក្នុងទឹកដីរបស់ពួកគេ ។

ប្រទេសបារាំង អៀរឡង់ និងទីក្រុង Quebec របស់ប្រទេសកាណាដា ស្ថិតក្នុងចំណោមអ្នកដែលបានចូលរួមសម្ព័ន្ធ Beyond Oil and Gas Alliance កាលពីថ្ងៃសុក្រ ។ ក្រុមនេះត្រូវបានបង្កើតឡើងដោយប្រទេសកូស្តារីកា និងដាណឺម៉ាកកាលពីដើមឆ្នាំនេះ ។

រដ្ឋមន្ត្រីក្រសួងបរិស្ថាន និងថាមពលកូស្តារីកា Andrea Meza Murillo បានអំពាវនាវឲ្យប្រទេសនានាមានភាពក្លាហាន និងទទួលយកសកម្មភាពជាក់ស្តែងទាំងអស់ ។

លោក Murillo បញ្ជាក់ថា សមាជិកទាំងអស់នឹងកំណត់កាលបរិច្ឆេទដើម្បីបញ្ចប់ការជីកយករ៉ែ និងឧស្ម័នធម្មជាតិ និងចាត់វិធានការកាត់បន្ថយការផលិតបន្ថែម ។

ទន្ទឹមនោះ ពួកគេ​ក៏​នឹង​លើក​ទឹក​ចិត្ត​ប្រទេស​ផ្សេង​ទៀត​ឲ្យ​ចូល​រួម​ចលនា​នេះ​ដែរ ។ ប៉ុន្តែរហូតមកដល់ពេលនេះ សហរដ្ឋអាមេរិក ជប៉ុន ចិន និងប្រទេសផលិតប្រេងសំខាន់ៗភាគច្រើនបានបដិសេធមិនចុះហត្ថលេខាលើកិច្ចព្រមព្រៀងនេះនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ សេតវិមាន បញ្ជាក់ពេលវេលា និងបញ្ហាដែលត្រូវលើកឡើងក្នុងកិច្ចប្រជុំរវាងលោក Biden និងលោក Xi