ក្រុមហាម៉ាស ចាប់បានត្រីដូហ្វីនចារកម្មអ៊ីស្រាអែល បំពាក់អាវុធ អាចធ្វើឃាតអ្នកប្រយុទ្ធនៅ ហ្គាហ្សា

ក្រុមហាម៉ាសអះអាងថា ចាប់បាន “ត្រីដូហ្វីនពិឃាត” ធ្វើចារកម្មរបស់អ៊ីស្រាអែល ដែលមានប្រដាប់ដោយអាវុធដែលអាចធ្វើឃាត អ្នកប្រយុទ្ធរបស់ខ្លួន នៅឆ្នេរសមុទ្រ ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូមួយដែលបង្ហោះតាមអ៊ីនធើណិត ដោយសាខាយោធារបស់អង្គការប៉ាឡេស្ទីនបានអះអាងថា អង្គភាពប្រយុទ្ធកងទ័ពជើងទឹករបស់ខ្លួន បានរកឃើញនិងចាប់បានប្រតិបត្តិករក្នុងទឹក នៅឯសមុទ្រ។

សាខានេះនិយាយថា អង្គភាពកងទ័ពជើងទឹក ត្រូវបានដេញតាមដោយភ្នាក់ងារស៊ើបការណ៍សម្ងាត់អ៊ីស្រាអែល បំពាក់ដោយអាវុធដែលមានសមត្ថភាព ធ្វើឃាតអ្នកប្រយុទ្ធ ហាម៉ាស។

អ្នកនាំពាក្យ Abu Hamza បាននិយាយនៅក្នុងវីដេអូថា ត្រីដូហ្វីនត្រូវបានរកឃើញដោយអ្នកប្រយុទ្ធម្នាក់របស់ក្រុមនេះ។

អ៊ីស្រាអែល មានកងនាវាមុជទឹក “ថ្នាក់ត្រីដូហ្វីន” ប៉ុន្តែវីដេអូរបស់ក្រុម ហាម៉ាស បានបញ្ជាក់យ៉ាងច្បាស់ថា ក្រុមនេះគឺសំដៅលើថនិកសត្វ មិនមែនទូកនោះទេ។

ពួកគេបានបង្ហាញវីដេអូ ដែលអះអាងថា ថតជាប់ពីចារកម្មដែលត្រូវបានចាប់ខ្លួន។ ត្រីនោះមានផ្ទុកដោយអាវុធដូចលំពែង ប៉ុន្តែមើលទៅស្រដៀងទៅនឹងឧបករណ៍ដែលប្រើនៅក្នុងការពិសោធន៍កងទ័ពជើងទឹកអាមេរិក រុស្ស៊ី និងអ៊ុយក្រែន។

ទោះបីជាយ៉ាងណាក៏ដោយ អ៊ីស្រាអែល​មិន​បាន​ឆ្លើយ​តប ទៅ​នឹង​ការ​ចោទ​ប្រកាន់​នេះ​ទេ។

គួរបញ្ជាក់ថា នេះមិនមែនជាលើកទីមួយទេ ដែលក្រុមហាម៉ាសអះអាងថា ទីភ្នាក់ងារស៊ើបការណ៍សម្ងាត់របស់អ៊ីស្រាអែល Mossad កំពុងប្រើប្រាស់ត្រីដូហ្វីនដើម្បីស៊ើបការណ៍។

នៅខែកក្កដាឆ្នាំ២០១៥ ក្រុមនេះនិយាយថា ខ្លួនចាប់បានត្រីដូហ្វីនធ្វើចារកម្មមួយក្បាល នៅឆ្នេរសមុទ្រហ្គាហ្សា បន្ទាប់ពីឃើញធ្វើចលនានៅខាងក្រៅកំពង់ផែ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖​ Daily Mail

ចុចអាន៖ អ៊ីស្រាអែល បើកការវាយប្រហារអាកាសជាថ្មីលើជ្រោយ ហ្គាហ្សា