កូវីដ នឹងបន្តរីករាលដាលជាច្រើនឆ្នាំខាងមុខទៀត

នាយកប្រតិបត្តិក្រុមហ៊ុន Pfizer បានប្រាប់ស្ថានីយទូរទស្សន៍បារាំង BFM TV កាលពីថ្ងៃចន្ទទី១៧ខែមករាថា មេរោគកូវីដ១៩ នឹងបន្តរីករាលដាលជាច្រើនឆ្នាំខាងមុខទៀត ប៉ុន្តែថា រលកបច្ចុប្បន្ននេះ គួរតែជាលើកចុងក្រោយដែលត្រូវដាក់ការរឹតបន្តឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Albert Bourla ក៏បានប្រាប់ទូរទស្សន៍នេះផងដែរថា វ៉ាក់សាំងកូវីដគឺមានសុវត្ថិភាព និងប្រសិទ្ធភាពសម្រាប់កុមារ។

រួមជាមួយនាយកប្រតិបត្តិក្រុមហ៊ុន Moderna លោក Stéphane Bancel, លោក Bourla បាននិយាយកាលពីសប្តាហ៍មុនថា ក្រុមហ៊ុនទាំង២កំពុងរៀបចំវ៉ាក់សាំងដូសជំរុញ ដែលនឹងព្យាបាលវីរុសកូវីដ១៩បំប្លែងខ្លួន អូមីក្រុង។

ថ្វីបើលោក Bourla មិនច្បាស់ថាតើមានតម្រូវការសម្រាប់ចាក់ដូសទី៤ដែរឬអត់ក៏ដោយ ប៉ុន្តែការសិក្សារបស់អ៊ីស្រាអែលនាពេលថ្មីៗនេះ ដែលធ្វើឡើងនៅមជ្ឈមណ្ឌលវេជ្ជសាស្ត្រ Sheba បានសន្និដ្ឋានថា វ៉ាក់សាំងដូសទី៤ បង្កើនអង់ទីគ័រគុណនឹង៥ ក្នុងរយៈពេលមួយសប្តាហ៍បន្ទាប់ពីការចាក់វ៉ាក់សាំង ដែលនេះបង្ហាញថា វ៉ាក់សាំងមានប្រសិទ្ធភាព។

គួរបញ្ជាក់ជាថ្មីថា អង្គការសុខភាពពិភពលោកបានសម្រេចផ្តល់សុពលភាពជាបន្ទាន់ សម្រាប់វ៉ាក់សាំង Pfizer-BioNTech នៅថ្ងៃទី៣១ខែធ្នូឆ្នាំ២០២០ ដែលជាជំហានមួយក្នុងការចាក់ថ្នាំបង្ការដើម្បីជួយប្រយុទ្ធប្រឆាំងនឹងការរាតត្បាតនៃមេរោគឆ្លង៕

ប្រែសម្រួល៖ Vann Vann

ប្រភព៖ JP

ចុចអាន៖ អឺរ៉ុប ត្រៀមចិត្តត្រៀមកាយ រស់នៅជាមួយ កូវីដ