ហេតុអ្វីបានជា រុស្ស៊ី ចង់ឈ្លានពាន អ៊ុយក្រែន? (មានវីដេអូ)

ប្រធានាធិបតីអាមេរិកលោក ចូ បៃដិន បានព្យាករណ៍ថា រុស្ស៊ីនឹងដាក់ទ័ពចូលប្រទេស អ៊ុយក្រែន។

រុស្ស៊ី​មាន​ទាហាន​ប្រហែល ១០ម៉ឺន​នាក់​នៅ​ព្រំដែន​ភាគ​ខាង​កើត​អ៊ុយក្រែន ប៉ុន្តែ​បដិសេធ​ថា ខ្លួនគ្មាន​ផែនការ​ឈ្លានពាននោះទេ។

ដោយឡែក ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានធ្វើការទាមទារជាបន្តបន្ទាប់ទៅកាន់ប្រទេសលោកខាងលិច រួមទាំងការទាមទារកុំអនុញ្ញាតឲ្យ អ៊ុយក្រែន ចូលរួមជាមួយអង្គការណាតូផងដែរ។

ទោះបីជាយ៉ាងណាក៏ដោយ កិច្ចពិភាក្សាមិនទទួលជោគជ័យទេ ដោយលោកខាងលិចបានបដិសេធការទាមទារមួយចំនួនរបស់លោកប្រធានាធិបតី ពូទីន។

ប៉ុន្មានសប្តាហ៍ចុងក្រោយនេះ ភាពតានតឹងកាន់តែឡើងកម្តៅ ដោយចក្រភពអង់គ្លេស បានបញ្ជូនអាវុធនិងទាហានជាបន្តបន្ទាប់ចូលទៅក្នុងប្រទេសអ៊ុយក្រែន ខណៈសហរដ្ឋអាមេរិក ក៏អនុញ្ញាតឲ្យសម្ព័ន្ធមិត្តរបស់ខ្លួន នាំចេញអាវុធអាមេរិក ទៅកាន់អតីតសហភាពសូវៀតមួយនេះផងដែរ។

តើហេតុអ្វីបានជារុស្ស៊ីចង់ឈ្លានពាន អ៊ុយក្រែន?

អ៊ុយក្រែន ​បាន​ប្រកាស​ឯករាជ្យ​ពី​សហភាព​សូវៀត​នៅ​ខែ​សីហា ឆ្នាំ​១៩៩១ ហើយ​បានប្រែក្លាយ​ទៅ​ជាប្រទេស​សេដ្ឋកិច្ច​ទីផ្សារ។

ប៉ុន្តែចាប់​តាំងពី​ពេលនោះ​មក ​មាន​ភាព​តានតឹង​រវាង​ទំនាក់ទំនង​ចាស់​របស់ខ្លួន​ជាមួយ​រុស្ស៊ី និង​សម្ព័ន្ធមិត្ត​ថ្មីៗ​ជាមួយបណ្តា​ប្រទេស​លោកខាងលិច។

អ្វីៗកាន់តែឡើងកម្តៅគឺនៅពេលដែលរុស្ស៊ីដណ្តើមយក និងកាត់បញ្ចូលឧបទ្វីបគ្រីមៀជាឧបសម្ព័ន្ធ នៅភាគខាងត្បូងអ៊ុយក្រែនក្នុងឆ្នាំ២០១៤ ជាការឆ្លើយតបទៅនឹងប្រជាជនអ៊ុយក្រែន ដែលទម្លាក់ប្រធានាធិបតីគាំទ្ររុស្ស៊ី តាមរយៈការធ្វើបាតុកម្មទ្រង់ទ្រាយធំ។

ប៉ុន្មានសប្តាហ៍ក្រោយមក រុស្ស៊ីបានគាំទ្រដល់ការបះបោរផ្តាច់ខ្លួន ដែលផ្ទុះឡើងនៅភាគខាងកើតប្រទេសអ៊ុយក្រែន។

តាំង​ពី​ពេល​នោះ​មក តែងតែមាន​ការ​ប៉ះ​ទង្គិច​នៅ​ព្រំដែន​។ មនុស្សជាង ១៤,០០០នាក់បានស្លាប់ក្នុងការប្រយុទ្ធគ្នានៅតំបន់ Donbas ភាគខាងកើតប្រទេសអ៊ុយក្រែន ហើយមនុស្សយ៉ាងតិច២លាននាក់ ត្រូវបង្ខំចិត្តភៀសខ្លួនចេញពីផ្ទះរបស់ពួកគេ។

អ៊ុយក្រែន និងប្រទេសលោកខាងលិច ចោទរុស្ស៊ីថា បានបញ្ជូនកងទ័ព និងអាវុធទៅគាំទ្រពួកឧទ្ទាម ប៉ុន្តែការចោទប្រកាន់នេះ ត្រូវបានក្រុងមូស្គូបានបដិសេធ។

កិច្ចព្រមព្រៀងសន្តិភាពឆ្នាំ២០១៥ ដែលសម្របសម្រួលដោយបារាំង និងអាល្លឺម៉ង់ បានជួយបញ្ចប់ការប្រយុទ្ធគ្នាទ្រង់ទ្រាយធំ ប៉ុន្តែកិច្ចខិតខំប្រឹងប្រែងដើម្បីឈានដល់ដំណោះស្រាយនយោបាយ ត្រូវបរាជ័យ។

រុស្ស៊ីបានចោទប្រកាន់អ៊ុយក្រែនថា មិនបានគោរពកិច្ចព្រមព្រៀងសន្តិភាពឆ្នាំ២០១៥ និងបានរិះគន់ប្រទេសលោកខាងលិចថា មិនលើកទឹកចិត្តឲ្យអ៊ុយក្រែនអនុលោមតាម។

លោកប្រធានាធិបតី ពូទីន ក៏បានបញ្ជាក់យ៉ាងច្បាស់ផងដែរថា លោកមើលឃើញថា បំណងប្រាថ្នារបស់អ៊ុយក្រែនក្នុងការចូលរួមជាមួយអង្គការណាតូ​ គឺជាការគំរាមកំហែងដល់ព្រំដែនរបស់រុស្ស៊ី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ INews

ចុចអាន៖ រុស្ស៊ីរៀបចំធ្វើសមយុទ្ធទ្រង់ទ្រាយធំ មានការចូលរួមពីកងនាវាទាំងអស់