ព័ត៌មានអន្ដរជាតិ

ចិនចុះកិច្ចព្រមព្រៀងថ្មីជាមួយរុស្ស៊ីតម្លៃ១១៧.៥ប៊ីលានដុល្លារ

បានផុស

៤ years មុន

នៅ

ថ្ងៃសៅរ៍ ៥ កុម្ភៈ ២០២២

ដោយ

លោកប្រធានាធិបតីរុស្ស៊ី វ្លាឌីមៀរ ពូទីន បានបង្ហាញកិច្ចព្រមព្រៀងប្រេង និងឧស្ម័នរុស្ស៊ីថ្មីជាមួយប្រទេសចិនដែលប៉ាន់ស្មានជាប្រាក់ ១១៧.៥ប៊ីលានដុល្លារអាមេរិកកាលពីថ្ងៃសុក្រ ដោយបានសន្យាបង្កើនការនាំចេញពីតំបន់ចុងបូព៌ារបស់រុស្ស៊ី ស្របពេលភាពតានតឹងជាមួយនឹងអ៉ឺរ៉ុបជុំវិញវិបត្តិជាមួយអ៊ុយក្រែន។

រុស្ស៊ី ដែលជាអ្នកផ្គត់ផ្គង់ឧស្ម័នលំដាប់ទី៣របស់ទីក្រុងប៉េកាំងបានពង្រឹងមិត្តភាពជាមួយចិន ដែលជាអ្នកប្រើប្រាស់ថាមពលធំបំផុតក្នុងពិភពលោក បានកាត់បន្ថយការពឹងផ្អែករបស់ខ្លួនទៅលើអតិថិជនថាមពលអឺរ៉ុប។

លោក ពូទីន បាននិយាយក្នុងជំនួបជាមួយលោកប្រធានាធិបតីចិន ស៊ី ជីនពីង ដើម្បីពិភាក្សាពីកិច្ចសហប្រតិបត្តិការកាន់តែជិតស្និទ្ធថា ៖«អ្នកជំនាញប្រេងរបស់យើងបានរៀបចំដំណោះស្រាយថ្មីល្អណាស់លើការផ្គត់ផ្គង់អ៊ីដ្រូកាបូនទៅកាន់សាធារណរដ្ឋប្រជាមានិតចិន»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ជំហានឆ្ពោះទៅមុខមួយត្រូវបានធ្វើនៅក្នុងឧស្សាហកម្មឧស្ម័ន»។ លោកបានបន្ថែមដោយយោងទៅលើកិច្ចពព្រមព្រៀងថ្មីក្នុងផ្គត់ផ្គង់ចំនួន១០ប៊ីលានម៉ែត្រគូបក្នុងមួយៗឆ្នាំទៅចិនពីតំបន់បូព៌ារបស់រុស្ស៊ី។

សូមបញ្ជាក់ថា លោក ពូទីន មានវត្តមាននៅទីក្រុងប៉េកាំងដើម្បីចូលពិធីបើកកីឡាអូឡាំពិករដូវរងា។

យោងតាមការវិភាគរបស់ Reuters បង្ហាញថា ការលក់ឧស្ម័នតែម្យ៉ាងអាចទទួលបានប្រាក់ប្រមាណ៣៧.៥ប៊ីលានដុល្លារអាមេរិកក្នុងរយៈ២៥ឆ្នាំ ដែលត្រូវបានស្មានថា តម្លៃឧស្ម័នជាមធ្យម ១៥០ដុល្លារអាមេរិក ក្នុង១០០០ម៉ែត្រគូបដូចដែលក្រុមឧស្ម័នយក្សរបស់រុស្ស៊ី Gazprom បានរាយការណ៍សម្រាប់កិច្ចព្រមព្រៀងថ្មីជាមួយប្រទេសចិន។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា កិច្ចព្រមព្រៀងមានរយៈពេល២៥ឆ្នាំ ខណៈប្រភពឧស្សាហកម្មចិនបាននិយាយថា វាមានរយៈពេល៣០ឆ្នាំ។

ដាច់ដោយឡែកមួយទៀត ក្រុមហ៊ុនឧស្ម័នយក្សរុស្ស៊ី Rosneft ដឹកនាំដោយសម័្ពន្ធមិត្តរបស់លោក ពូទីន គឺលោក Igor Sechin បានចុះកិច្ចព្រមព្រៀងជាមួយក្រុមហ៊ុនចិន CNPC ដើម្បីផ្គត់ផ្គង់ប្រេង១០០លានតោនតាមប្រទេសកាហ្សាក់ស្ថានរយៈពេល១០ឆ្នាំដែលពង្រីកកិច្ចព្រមព្រៀងមានស្រាប់ប្រកបដោយប្រសិទ្ធភាព។

ក្រុមហ៊ុន Rosneft បាននិយាយថា កិច្ចព្រមព្រៀងថ្មីនេះមានតម្លៃ៨០ប៊ីលានដុល្លារអាមេរិក។ កិច្ចព្រមព្រៀងបានជំរុញរូបិយប័ណ្ណ និងផ្សារភាគហ៊ុនរុស្ស៊ី រាប់ទាំងភាគហ៊ុននៅក្នុងក្រុមហ៊ុន Rosneft និង Gazprom ផង៕

ប្រែសម្រួល៖ វីរបុត្រ
ប្រភព៖ reuters