អាមេរិក ថា មានតែ ចិន ប៉ុណ្ណោះដែលហ៊ានប្រាប់ រុស្ស៊ី ឲ្យបន្ថយភាព តានតឹងជាមួយ អ៊ុនក្រែន

មន្ត្រីជាន់ខ្ពស់ក្រសួងការបរទេសអាមេរិកលោក Daniel Kritenbrink បាននិយាយថា មានតែប្រទេសចិនប៉ុណ្ណោះដែលអាចលើកទឹកចិត្ត និងហ៊ានប្រាប់រុស្ស៊ីឲ្យបន្ថយភាពតានតឹងទាក់ទងនឹងស្ថានភាពជាមួយអ៊ុយក្រែន ។

លោក Kritenbrink បាននិយាយកាលពីថ្ងៃសុក្រទាក់ទងនឹងកិច្ចប្រជុំរវាងប្រធានាធិបតីរុស្ស៊ីលោក វ្ល៉ាឌីមៀ ពូទីន និងប្រធានាធិបតីចិនលោក ស៊ី ជីនពីង ថា “កិច្ចប្រជុំគួរតែផ្តល់ឲ្យប្រទេសចិននូវឱកាសដើម្បីលើកទឹកចិត្តរុស្ស៊ីបន្តការទូត និងបន្ថយភាពតានតឹងនៅអ៊ុយក្រែន នោះគឺជាអ្វីដែលពិភពលោករំពឹងពីមហាអំណាច” ។

លោករដ្ឋមន្ត្រីក្រសួងការបរទេសអាមេរិកបាននិយាយនៅក្នុងសន្និសីទតាមទូរស័ព្ទកាលពីថ្ងៃសុក្រថា “ខ្ញុំគិតថា វាយុត្តិធម៌ក្នុងការនិយាយថា ជំនួបរវាងប្រធានាធិបតីរុស្ស៊ី វ្ល៉ាឌីមៀ ពូទីន និងលោក ស៊ី ជីនពីង ប្រធានាធិបតីចិន និងសេចក្តីថ្លែងការណ៍រួម រុស្ស៊ី-ចិន ឆ្លុះបញ្ចាំងពីវិធីសាស្រ្តដែលប្រទេសទាំងពីរបានអនុវត្តមួយរយៈមកហើយ ។

នៅក្នុងសេចក្តីថ្លែងការណ៍រួមមួយកាលពីព្រឹកថ្ងៃសុក្រ រុស្ស៊ី និងចិនបាននិយាយថា ពួកគេប្រឆាំងនឹងការពង្រីកបន្ថែមទៀតនៃអង្គការសន្ធិសញ្ញាអាត្លង់ទិកខាងជើង (NATO) ហើយបានអំពាវនាវឲ្យសម្ព័ន្ធភាពបោះបង់ចោលវិធីសាស្រ្តនៃសង្រ្គាមត្រជាក់ដែលប្រកាន់មនោគមវិជ្ជារបស់ខ្លួន ។

ស្ថានភាពទាក់ទងនឹងអ៊ុយក្រែនកាន់តែអាក្រក់ទៅៗក្នុងរយៈពេលប៉ុន្មានខែកន្លងមកនេះ បន្ទាប់ពីសហរដ្ឋអាមេរិក និងសម្ព័ន្ធមិត្តរបស់ខ្លួនបានចោទប្រកាន់រុស្ស៊ីអំពីការកសាងកងទ័ពនៅជិតព្រំដែនជាមួយអ៊ុយក្រែនក្នុងការត្រៀមលក្ខណៈសម្រាប់ការធ្វើសកម្មភាពយោធាណាមួយ ។

ទន្ទឹមនោះ ទីក្រុងមូស្គូបានបដិសេធការចោទប្រកាន់នេះ ហើយបាននិយាយថា ខ្លួនរក្សាសិទ្ធិក្នុងការចល័តកងទ័ពនៅលើទឹកដីអធិបតេយ្យភាពរបស់រុស្ស៊ី ។ រុស្ស៊ីក៏បាននិយាយផងដែរថា ណាតូកំពុងមានផែនការពង្រីកកម្លាំងបន្ថែមទៀតទៅភាគខាងកើត ហើយបានព្រមានថា ទង្វើបែបនេះគឺជាការគំរាមកំហែងដល់សន្តិសុខជាតិរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក ចោទ រុស្ស៊ី រៀបផែនការបង្កើតលេស ដើម្បីវាយប្រហារ អ៊ុយក្រែន