ព័ត៌មានអន្ដរជាតិ

លោក ពូទីន បង្ហាញលក្ខខណ្ឌដែលផ្តល់ឲ្យការវាយប្រហារនៅអ៊ុយក្រែនឈប់

បានផុស

៤ years មុន

នៅ

ថ្ងៃចន្ទ ៧ មីនា ២០២២

ដោយ

លោកប្រធានាធិបតីរុស្ស៊ី វ្លាឌីមៀរ ពូទីន បានប្រាប់មេដឹកនាំតួកគីលោក Recep Tayyip Erdogan កាលពីថ្ងៃអាទិត្យម្សិលមិញថា រដ្ឋាភិបាលប្រទេសអ៊ុយក្រែនត្រូវតែបញ្ឈប់បាញ់គ្នា និងបំពេញចំពោះការទាមទារទាំងអស់របស់ទីក្រុងមូស្គូដើម្បីឲ្យការការប្រយុទ្ធគ្នានៅអ៊ុយក្រែនត្រូវបានបញ្ឈប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេវាសារព័ត៌មានរបស់វិមានក្រឹមឡាំងថា លោក ពូទីន បានពន្យល់កំឡុងពេលការហៅទូរសព្ទថា ៖«ប្រតិបត្តិការពិសេសរបស់ទីក្រុងមូស្គូលើប្រទេសជិតខាងបញ្ឈប់ទៅបាន លុះត្រាតែទីក្រុងកៀវបញ្ឈប់សកម្មភាពយោធារបស់ខ្លួន និងបំពេញតាមការទាមទាររបស់រុស្ស៊ីដែលបានដឹងច្បាស់ហើយ»។

លោកប្រធានាធិបតីរុស្ស៊ីបានធានាចំពោះលោក Erdogan ថា រុស្ស៊ីបានត្រៀមខ្លួនរួចរាល់ហើយសម្រាប់កិច្ចសន្ទនាជាមួយភាគីអ៊ុយក្រែន ព្រមទាំងដៃគូបរទេសនានាដើម្បីរកដំណោះស្រាយសន្តិភាពចំពោះសង្គ្រាម។

ទោះបីជាយ៉ាងណា លោកបានព្រមានថា ការប៉ុនប៉ងណាមួយដើម្បីអូសទាញការចរចាដែលអាចត្រូវធ្វើឡើងដោយភាគីអ៊ុយក្រែនដើម្បីប្រមូលផ្តុំកងកម្លាំង និងធនធានរបស់ខ្លួននឹងក្លាយជាបរាជ័យខ្លួនឯង។

លោកប្រធានាធិបតី ពូទីន បានបន្ថែមថា យោធារុស្ស៊ីធ្វើអ្វីៗគ្រប់យ៉ាងដើម្បីការពារជីវិតជនស៊ីវិល ដោយធ្វើការវាយប្រហារលើតែទីតាំងយោធាអ៊ុយក្រែនប៉ុណ្ណោះ។ លោកថា ៖«ក្នុងបរិបទនេះ សកម្មភាពអ្នកជាតិនិយម ដែលជាអង្គភាពមេទ័ព neo-Nazi មើលទៅពិតជាឃោរឃៅ និងអាត្មានិយម ដោយសារពួកគេបន្តបាញ់ផ្លោងនៅតំបន់ Donbass និងប្រើជនស៊ីវិល រាប់ទាំងជនបរទេសដែលត្រូវបានចាប់ធ្វើជាចំណាត់ខ្មាំងដែលជាខែលមនុស្សជាតិនៅក្នុងទីក្រុង និងទីប្រជុំជននានារបស់អ៊ុយក្រែន»។

យោងតាមការិយាល័យរបស់លោកប្រធានាធិបតីតួកគី លោក Erdogan បានព្យាយាមបញ្ចុះបញ្ចូលលោក ពូទីន ថា បទឈប់បាញ់គ្នាបន្ទាន់ពិតជាសំខាន់ណាស់នៅអ៊ុយក្រែនដើម្បីផ្តល់ជំនួយមនុស្សធម៌ដល់ប្រជាជន និងបង្កើតលក្ខខណ្ឌសម្រាប់ដំណោះស្រាយនយោបាយ។

លោកប្រធានាធិបតីតួកគីបានជំរុញសមភាគីរុស្ស៊ីតាមទូរសព្ទថា ៖«សូមបើកផ្លូវដើម្បីសន្តិភាពទាំងអស់គ្នា»៕

ប្រែសម្រួល៖ វីរបុត្រ
ប្រភព៖ RT

Related Topics:ប្រទេសរុស្ស៊ី