ព័ត៌មានអន្ដរជាតិ

ថ្ងៃនេះ លោក ចូ បៃដិន នឹងហៅទូរសព្ទពិភាក្សាជាមួយលោក ស៊ី ជីនពីង ពីវិបត្តិអ៊ុយក្រែន

បានផុស

២ years មុន

នៅ

ថ្ងៃសុក្រ ១៨ មីនា ២០២២

ដោយ

សេតវិមានបាននិយាយកាលពីថ្ងៃព្រហស្បតិ៍ថា ប្រធានាធិបតីសហរដ្ឋអាមេរិក លោក ចូ បៃដិន នឹងធ្វើការហៅទូរសព្ទនៅថ្ងៃសុក្រ ទី១៨ ខែមីនានេះជាមួយប្រធានាធិបតីចិន លោក ស៊ី ជីនពីង ខណៈអាមេរិកដាក់សម្ពាធលើចិនកុំឲ្យផ្តល់ការគាំទ្រដល់រុស្ស៊ីក្នុងការវាយប្រហារលើអ៊ុយក្រែន។

ការហៅទូរសព្ទតាមផែនការត្រូវបានប្រកាសដោយរដ្ឋមន្ត្រីសារព័ត៌មានប្រចាំសេតវិមាន លោកស្រី Jen Psaki ដែលបាននិយាយថា ការហៅទូរសព្ទជាផ្នែកមួយនៃកិច្ចខិតខំប្រឹងប្រែងរបស់អាមេរិកដែលកំពុងបន្តដើម្បីរក្សាទំនាក់ទំនងបើកចំហររវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីមានប្រសាសន៍ថា ៖«មេដឹកនាំទាំងពីរនឹងពិភាក្សាគ្នាពីការគ្រប់គ្រងនៃការប្រកួតប្រជែងរវាងប្រទេសយើងទាំងពីរ សង្គ្រាមរវាងអ៊ុយក្រែន និងរុស្ស៊ី ព្រមទាំងបញ្ហាផ្សេងៗទៀតដែលជាកង្វល់ទៅវិញទៅមក»។

ការហៅទូរសព្ទនឹងធ្វើឡើង បន្ទាប់ពីទីប្រឹក្សាសន្តិសុខជាតិសេតវិមាន លោក Jake Sullivan បានចំណាយពេល៧ម៉ោងក្នុងការពិភាក្សាជាមួយទូតចិនលោក Yang Jiechi នៅទីក្រុងរ៉ូមកាលពីថ្ងៃចន្ទ។

អំឡុងពេលកិច្ចប្រជុំនោះ លោកបានលើកឡើងអំពីការព្រួយបារម្ភពីគោលជំហររបស់ចិនជាមួយរុស្ស៊ី។ មន្ត្រីរដ្ឋបាល ចូ បៃដិន ជាន់ខ្ពស់ម្នាក់បាននិយាយថា លោក Sullivan លើកឡើងដោយផ្ទាល់ជាមួយលោក Yang អំពី«ផលប៉ះពាល់ និងផលវិបាក»សម្រាប់ចិនដែលផ្តល់ការគាំទ្រទៅរុស្ស៊ី។

កិច្ចពិភាក្សានៅទីក្រុងរ៉ូមត្រូវបានចាត់ទុកថា មានភាពតានតឹង ប៉ុន្តែមិនមានលទ្ធផលជាក់លាក់ទេ។

មន្ត្រីរដ្ឋបាល ចូ បៃដិន ជាន់ខ្ពស់និយាយថា ៖«យើងខ្ញុំព្រួយបារម្ភយ៉ាងជ្រាលជ្រៅអំពីគោលជំហររបស់ចិនជាមួយរុស្ស៊ី។ យើងខ្ញុំតាមដានយ៉ាងជិតដិត ប្រសិនបើចិន ឬប្រទេសណាមួយដែលផ្តល់ការគាំទ្រ ទាំងផ្នែកយោធា សេដ្ឋកិច្ច ឬអ្វីផ្សេងដល់រុស្ស៊ី»៕

ប្រែសម្រួល៖ វីរបុត្រ
ប្រភព៖ Reuters