អ៊ុយក្រែន រំដោះបានទីក្រុងមួយមកវិញ (មានវីដេអូ)

កងកម្លាំងអ៊ុយក្រែន បានដណ្តើមកាន់កាប់ទីក្រុង Irpin មកវិញទាំងស្រុង ពីកងទ័ពលុកលុយរបស់រុស្ស៊ី។ នេះបើតាមការអះអាងរបស់ចៅហ្វាយក្រុង កាលពីថ្ងៃចន្ទទី២៨ខែមីនា។

លោក Oleksandr Markushyn បាននិយាយនៅក្នុងការបង្ហោះវីដេអូលើ Telegram ថា “យើងមានដំណឹងល្អនៅថ្ងៃនេះ។ ទីក្រុង Irpin ត្រូវបានរំដោះ។ យើង​ដឹងថា ​នឹង​មាន​ការ​វាយ​ប្រហារ​បន្ថែម​ទៀត​លើ​ក្រុង​របស់​យើង តែ​យើង​នឹង​ការពារ​ដោយភាព​ក្លាហាន”។

ទោះបីជាយ៉ាងណាក៏ដោយ ការអះអាងរបស់លោក Markushyn មិនទាន់ត្រូវបានគេផ្ទៀងផ្ទាត់ទេ។

ទីក្រុង Irpin គឺជាចំណុចសំខាន់មួយនៃការប្រយុទ្ធជាមួយកងទ័ពរុស្ស៊ី នៅជិតរដ្ឋធានី កៀវ។

ទីក្រុងនេះ ស្ថិតនៅចម្ងាយជាង ១៩គីឡូម៉ែត្រ ភាគពាយព្យទីក្រុង កៀវ ហើយបានក្លាយជាសមរភូមិជួរមុខ នៅពេលកងទ័ពរុស្ស៊ីព្យាយាមរុលចូលទៅកាន់រដ្ឋធានី។

ទីក្រុង Irpin បានរងការ​បាញ់​ផ្លោង​ដោយ​កង​កម្លាំង​រុស្ស៊ី ដែលជាហេតុ​បង្ខំឲ្យ​មនុស្ស​រាប់​ពាន់​នាក់​ ​ភៀស​ខ្លួន​ចេញ​ពី​ទីក្រុង។

កាលពីដើមខែនេះ ពលរដ្ឋមួយចំនួនធំ បានចាកចេញពីទីក្រុង ចំពេលសីតុណ្ហភាពចុះដល់ក្រោមសូន្យអង្សាសេ ហើយមានសេចក្តីរាយការណ៍ថា ទាហានរុស្ស៊ីបានរឹបអូសយកមន្ទីរពេទ្យធំ និងមជ្ឈមណ្ឌលវេជ្ជសាស្ត្រនៅក្បែរនោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Standard

ចុចអាន៖ លោក Abramovich និងអ្នកចរចាសន្តិភាពអ៊ុយក្រែន ២នាក់ សង្ស័យត្រូវថ្នាំបំពុល