ឧទ្ធម្ភាគចក្រអ៊ុយក្រែន បើកការវាយប្រហារក្នុងប្រទេស រុស្ស៊ី កម្ទេចរោងចក្រប្រេង ឆេះសន្ធោសន្ធៅ

ឧទ្ធម្ភាគចក្រ​អ៊ុយក្រែនធុន Mi-24 ចំនួនពីរគ្រឿង ​បាន​វាយប្រហារ​រោងចក្រ​ប្រេង​មួយកន្លែង​នៅ​ក្នុង​ប្រទេស ​រុស្ស៊ី។ នេះបើយោងតាមការឲ្យដឹងពីអភិបាលក្នុងតំបន់។

លោក Vyacheslav Gladkov ដែលត្រូវបានតែងតាំងដោយលោក Vladimir Putin ក្នុងឆ្នាំ ២០២០ បាននិយាយថា ឧទ្ធម្ភាគចក្រយោធាពីរគ្រឿងរបស់អ៊ុយក្រែន បានវាយប្រហារទីតាំងស្តុកប្រេងក្នុងទីក្រុង Belgorod របស់រុស្ស៊ីនៅថ្ងៃសុក្រទី០១ខែមេសានេះ បន្ទាប់ពីហោះឆ្លងកាត់ព្រំដែនក្នុងរយៈកម្ពស់ទាប។

លោក Gladkov បន្ថែមថា គ្រោះអគ្គិភ័យជាលទ្ធផលបានបណ្តាលឲ្យកម្មករពីរនាក់រងរបួស ខណៈមនុស្សក្នុងតំបន់មួយចំនួននៅទីក្រុង ដែលមានទីតាំងជិតព្រំដែនអ៊ុយក្រែនមួយនេះ កំពុងត្រូវបានជម្លៀសចេញ។

វីដេអូចែករំលែកនៅលើប្រព័ន្ធផ្សព្វផ្សាយសង្គម បានបង្ហាញពីការវាយប្រហារ ដែលកើតឡើងនៅម៉ោង៥និង៤៣នាទីព្រឹក (ម៉ោងក្នុងស្រុក) បន្ទាប់មក ឧទ្ធម្ភាគចក្របានហោះចេញពីភ្លើង។

ទោះបីជាយ៉ាងណាក៏ដោយ រដ្ឋាភិបាល​អ៊ុយក្រែន​មិន​ទាន់​បញ្ជាក់​ពី​ឧបទ្ទវហេតុ​នេះ​ទេ។

ទីក្រុងរុស្ស៊ីដែលមានប្រជាជន ៣៦៩ ០០០នាក់មួយនេះ គឺស្ថិតនៅចម្ងាយជាង៤០គីឡូម៉ែត្រពីព្រំដែនជាមួយអ៊ុយក្រែន និងជាង ៨០គីឡូម៉ែត្រពីទីក្រុង Kharkiv ភាគខាងកើតប្រទេស អ៊ុយក្រែន។

គួរបញ្ជាក់ថា ការវាយប្រហារដោយឧទ្ធម្ភាគចក្រនៅព្រឹកព្រលឹមថ្ងៃសុក្រនេះ គឺជាការវាយប្រហារលើកទីពីររបស់អ៊ុយក្រែន លើទឹកដីរុស្ស៊ី ចាប់តាំងពីសង្គ្រាមផ្ទុះឡើង បន្ទាប់ពីមូលដ្ឋានទ័ពអាកាស Millerovo ត្រូវបានវាយប្រហារកាលពីចុងខែកុម្ភៈ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី កំពុងប្រមូលកងទ័ពមកពី ហ្សកហ្ស៊ី ទៅជួយប្រយុទ្ធនៅ អ៊ុយក្រែន