ខ្មាន់កាំភ្លើងមិនស្គាល់មុខបាញ់ប្រហារទេសាភិបាលរងធនាគារកណ្តាលមីយ៉ាន់ម៉ាម្នាក់

ប្រភពព័ត៌មានបានឱ្យដឹងថា ទេសាភិបាលរងរបស់ធនាគារកណ្តាលមីយ៉ាន់ម៉ាម្នាក់ត្រូវបានខ្មាន់កាំភ្លើងបាញ់ប្រហារបណ្តាលឱ្យរងរបួស នៅឯគេហដ្ឋានរបស់ជនរងគ្រោះតែម្តងក្នុងទីក្រុងយ៉ាំងហ្គោន។

លោកស្រី Than Than Swe ទេសាភិបាលរងរបស់ធនាគារកណ្តាលមីយ៉ាន់ម៉ាដែលទើបត្រូវបានតែងតាំងដោយរដ្ឋាភិបាលយោធាមីយ៉ាន់ម៉ាបន្ទាប់ពីរដ្ឋប្រហារ ត្រូវបានខ្មាន់កាំភ្លើងបាញ់ប្រហារនៅក្នុងគេហដ្ឋានរបស់លោកស្រីក្នុងទីក្រុងយ៉ាំងហ្គោន នៅម៉ោងប្រហែល ១១៖៣០នាទីព្រឹក ថ្ងៃទី៧ ខែមេសា ឆ្នាំ២០២២ បណ្តាលឱ្យរងរបួសធ្ងន់ ហើយបច្ចុប្បន្នលោកស្រីកំពុងសម្រាកព្យាបាលនៅឯមន្ទីរពេទ្យយោធា។ នេះបើយោងតាមការឱ្យដឹងពីអ្នកនាំពាក្យរដ្ឋាភិបាលយោធាមីយ៉ាន់ម៉ាលោក Zaw Min Tun។

ទោះបីជាយ៉ាងណាក៏ដោយ រហូតមកដល់ពេលនេះ នៅមិនទាន់មានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះនៅឡើយទេ។

ប្រភពដដែលបន្តថា នៅទូទាំងប្រទេសមានការបាញ់សម្លាប់មន្ត្រីថ្នាក់ក្រោមរបស់រដ្ឋាភិបាលយោធា ឬអ្នកដែលរងការចោទប្រកាន់ពីបទផ្តល់ព័ត៌មានស្ទើរតែរាល់ថ្ងៃ ប៉ុន្តែព័ត៌មានលម្អិតអំពីហេតុការណ៍នេះច្រើនតែស្រពិចស្រពិល ហើយការសងសឹកពីយោធាជាញឹកញាប់ត្រូវបានធ្វើឡើងយ៉ាងឆាប់រហ័ស។

គួរកត់សម្គាល់ថា កាលពីថ្ងៃអាទិត្យទី៣ ខែមេសាកន្លងទៅនេះ ធនាគារកណ្តាលមីយ៉ាន់ម៉ាបានចេញបទបញ្ជាឱ្យប្រជាជនក្នុងស្រុកដែលកាន់រូបិយប័ណ្ណបរទេស ត្រូវតែយកប្រាក់ទាំងនោះទៅផ្ញើជាមួយធនាគារដែលមានការអនុញ្ញាត ហើយប្តូរទៅជារូបិយប័ណ្ណក្យ័ត(Kyat) ក្នុងរយៈពេលមួយថ្ងៃនៃថ្ងៃធ្វើការ បើជនណាមិនគោរពតាមបទបញ្ជានឹងត្រូវកាត់ទោសតាមច្បាប់៕

ប្រែសម្រួល៖ គង់ សំអាន

ប្រភព៖ Mgronline