ព័ត៌មានអន្ដរជាតិ

លោក Zelensky សុំដោះដូរមិត្តជិតស្និទ្ធរបស់ Putin ដែលទើបចាប់បាន ជាមួយពលរដ្ឋ អ៊ុយក្រែន (មានវីដេអូ)

បានផុស

៤ years មុន

នៅ

ថ្ងៃពុធ ១៣ មេសា ២០២២

ដោយ

ប្រធានាធិបតីអ៊ុយក្រែនបានស្នើនៅថ្ងៃពុធនេះនូវការដោះដូរលោក Viktor Medvedchuk មិត្តជិតស្និទ្ធរបស់ប្រធានាធិបតីរុស្ស៊ីលោក Vladimir Putin ជាមួយជនជាតិអ៊ុយក្រែនដែលកំពុងជាប់ឃុំឃាំងនៅរុស្ស៊ី ។

លោក Volodymyr Zelenskyy បាននិយាយនៅក្នុងវីដេអូមួយដែលបានបង្ហោះនៅលើ Telegram ថា “ខ្ញុំផ្តល់ជូនសហព័ន្ធរុស្ស៊ីនូវការដោះដូរបុរសម្នាក់នេះសម្រាប់ក្មេងប្រុស និងក្មេងស្រីរបស់យើងដែលឥឡូវនេះត្រូវបានជាប់ឃុំឃាំងដោយរុស្ស៊ី” ។

លោកបន្ថែមថា “វាជាការមើលងាយពីសំណាក់លោក Medvedchuk ជាពិសេសសម្រាប់ការក្លែងបន្លំខ្លួនជាយោធា ។ ប្រសិនបើលោក Medvedchuk ជ្រើសរើសឯកសណ្ឋានយោធាសម្រាប់ខ្លួនគាត់ នោះគាត់នឹងស្ថិតនៅក្រោមច្បាប់នៃសម័យសង្គ្រាម” ។

ដោយចែករំលែករូបថតរបស់លោក Medvedchuk អង្គុយលើកៅអីដោយដៃជាប់ខ្នោះ, លោក Zelensky បានបង្ហោះលើ Telegram កាលពីថ្ងៃអង្គារថា “អ៊ុយក្រែនក្នុងប្រតិបត្តិការពិសេសមួយបានចាប់ជនផ្តាច់ការដែលរត់គេចខ្លួនម្នាក់ និងត្រូវបានគេស្គាល់ថាជា មេដឹកនាំគណបក្សប្រឆាំងដ៏លេចធ្លោបំផុតរបស់អ៊ុយក្រែន ហើយលោកបានអរគុណដល់សេវាសន្តិសុខនៃប្រទេសអ៊ុយក្រែន (SBU) សម្រាប់ការធ្វើបានយ៉ាងល្អនេះ” ។

គួរបញ្ជាក់ថា កាលពីឆ្នាំមុន ករណីក្បត់ជាតិត្រូវបានបើកឡើងក្នុងប្រទេសអ៊ុយក្រែនប្រឆាំងនឹងលោក Medvedchuk ដែលជាមេដឹកនាំគណបក្សប្រឆាំង Opposition Platform-For Life ដោយលោកត្រូវគេរាយការណ៍ថា បានរត់គេចពីការឃុំខ្លួនក្នុងផ្ទះ បន្ទាប់ពីសង្គ្រាមរបស់រុស្ស៊ីលើអ៊ុយក្រែនបានចាប់ផ្តើមនៅថ្ងៃទី ២៤ ខែកុម្ភៈ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ប្រទេស ណាតូ មួយនេះជាតួអង្គសន្តិសុខសំខាន់បំផុតសម្រាប់ អឺរ៉ុប