លោក ពូទីន ដាក់ពង្រាយប្រព័ន្ធបាញ់នុយក្លេអ៊ែរ នៅជិតព្រំដែន អ៊ុយក្រែន

យោធាអ៊ុយក្រែននិយាយថា លោក ពូទីន បានដាក់ពង្រាយប្រព័ន្ធបាញ់មីស៊ីលចល័តធុន Iskander-M នៅចម្ងាយ ៦០គីឡូម៉ែត្រពីព្រំដែនអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​មីស៊ីល Ballistic ចំនួន២គ្រាប់ ​របស់​ប្រព័ន្ធ​ចល័ត​នេះ មាន​រយៈ​ចម្ងាយ​ដល់​ទៅ ៤៨២គីឡូម៉ែត្រ ហើយ​អាច​ផ្ទុក​ក្បាល​គ្រាប់​ធម្មតា ឬ​នុយក្លេអ៊ែរទៀតផង។

កងកម្លាំងប្រដាប់អាវុធអ៊ុយក្រែនបាននិយាយនៅក្នុងការអាប់ដេតព័ត៌មានពេលព្រឹកប្រចាំថ្ងៃរបស់ខ្លួនថា “សត្រូវបានបង្កើនចំនួនកងទ័ពនៅក្នុងតំបន់ Belgorod ដោយការផ្ទេរ និងប្រមូលផ្តុំអង្គភាពបន្ថែម”។

ទោះមិនបានផ្តល់ព័ត៌មានលម្អិតអំពីទីតាំងនៃប្រព័ន្ធទាំងនេះក៏ដោយ ប៉ុន្តែអ៊ុយក្រែននិយាយថា “យោងតាមព័ត៌មានដែលទទួលបាន ប្រព័ន្ធបាញ់មីស៊ីល Iskander-M ត្រូវបានដាក់ពង្រាយនៅចម្ងាយ ៦០ គីឡូម៉ែត្រពីព្រំដែនជាមួយអ៊ុយក្រែន”។

Belgorod គឺជាទីក្រុង និងជាមជ្ឈមណ្ឌលរដ្ឋបាលនៃតំបន់ Belgorod របស់ប្រទេសរុស្ស៊ី ភាគខាងជើងនៃព្រំដែនជាមួយអ៊ុយក្រែន។

Iskander ដែលជាប្រព័ន្ធមីស៊ីលផ្លោងចល័ត ដាក់លេខកូដ SS-26 Stone ដោយអង្គការណាតូ គឺត្រូវបានប្រើប្រាស់ជំនួសមីស៊ីល Scud របស់សូវៀត។

ដោយត្រូវបានប្រើប្រាស់ជាលើកដំបូង ក្នុងការប្រយុទ្ធឆ្នាំ ២០០៨ នៅហ្សកហ្ស៊ី, មីស៊ីល Iskander ត្រូវបានរចនាឡើងដើម្បីគេចប្រព័ន្ធការពារមីស៊ីល ដោយការហោះហើរលើគន្លងទាប និងបង្កើនសមត្ថភាពក្នុងការហោះហើរដើម្បីវាយប្រហារគោលដៅចម្ងាយឆ្ងាយរហូតដល់ ៥០០ គីឡូម៉ែត្រ។ នេះបើយោងតាមមជ្ឈមណ្ឌលយុទ្ធសាស្រ្តនិងការសិក្សាអន្តរជាតិ (CSIS)៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ឃ្លាំងស្តុកប្រេងសម្រាប់ផ្គត់ផ្គង់ឲ្យកងទ័ពរុស្ស៊ី នៅព្រំដែន អ៊ុយក្រែន ត្រូវអគ្គិភ័យឆាបឆេះ