ប្រទេសមួយទៀត ចេញមុខអះអាង កំពុងបង្វឹកទាហានអ៊ុយក្រែន ប្រើកាំភ្លើងយន្ត

តាមការបញ្ជាក់កាលពីថ្ងៃព្រហស្បតិ៍ទី២៨ខែមេសា ពីរដ្ឋមន្ត្រីការពារជាតិកាណាដាលោកស្រី Anita Anand, យោធាកាណាដា កំពុងបង្វឹកទាហានអ៊ុយក្រែនជាច្រើននាក់ អំពីរបៀបប្រើប្រាស់កាំភ្លើងធំ Howitzer។

លោកស្រី Anand បាននិយាយក្នុងសន្និសីទសារព័ត៌មានមួយ នៅមន្ទីរបញ្ចកោណជាមួយរដ្ឋមន្ត្រីការពារជាតិអាមេរិក លោក Lloyd Austin ថា “កាលពីសប្តាហ៍មុន រួមជាមួយនឹងសម្ព័ន្ធមិត្តអាមេរិករបស់យើង យើងបានបង្កើនការគាំទ្ររបស់យើង ដោយបញ្ជូនកាំភ្លើងធំ Howitzer ធុន M777 ទៅឲ្យកងកម្លាំងអ៊ុយក្រែន ហើយខ្ញុំអាចបញ្ជាក់ថា ទាហានកាណាដាឥឡូវនេះ កំពុងបង្វឹកសមភាគីអ៊ុយក្រែនក្នុងការប្រើប្រាស់អាវុធទាំងនេះ”។

ទោះបីជាយ៉ាងណាក៏ដោយ លោកស្រី Anand មិន​បាន​បញ្ជាក់​ថា​តើ​ការបង្វឹក ​កំពុង​ប្រព្រឹត្ត​ទៅ​នៅ​ទីតាំង​ណា​នោះទេ។

ដោយឡែក មន្ត្រីការពារជាតិជាន់ខ្ពស់របស់សហរដ្ឋអាមេរិក បាននិយាយនៅក្នុងសុន្ទរកថាមុននេះថា សហរដ្ឋអាមេរិកបច្ចុប្បន្នកំពុងបណ្តុះបណ្តាលក្រុមទីពីរ ដែលមានទាហានអ៊ុយក្រែនជាង៥០នាក់ អំពីរបៀបប្រើប្រាស់កាំភ្លើងធំ Howitzer និងរ៉ាដាចល័ត Q-64។

ការបណ្តុះបណ្តាលនេះ ត្រូវបានគេរំពឹងថា នឹងចំណាយពេលប្រហែលមួយសប្តាហ៍។

មន្ត្រីការពារជាតិអាមេរិកនិយាយថា ជាង៦០% នៃកាំភ្លើងធំ ៩០គ្រឿងដែលលោកប្រធានាធិបតី Joe Biden ប្តេជ្ញាប្រគល់ទៅឲ្យអ៊ុយក្រែន នាពេលថ្មីៗនេះ ត្រូវបានបញ្ជូនទៅប្រទេសអ៊ុយក្រែនរួចហើយ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ប្រទេសអឺរ៉ុបណាខ្លះហើយ ដែលយល់ព្រមទូទាត់ប្រាក់ រូបិ៍ល ក្នុងការទិញឧស្ម័នពីរុស្ស៊ី?