រុស្ស៊ី​ ចាត់ទុក​ការ​ដឹកជញ្ជូន​សព្វាវុធ​បរទេស​ទៅ​ឲ្យអ៊ុយក្រែន ជា “គោលដៅ​ស្របច្បាប់” ដើម្បីវាយប្រហារ

រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា សព្វាវុធណាដែលដឹកចូលប្រទេសអ៊ុយក្រែនពីលោកខាងលិច គឺជាគោលដៅស្របច្បាប់សម្រាប់កងកម្លាំងប្រដាប់អាវុធរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយទូរទស្សន៍ Al-Arabiya លោក Lavrov បាននិយាយថា “សព្វាវុធណាមួយ ឬការដឹកជញ្ជូនអាវុធណាមួយនៅលើទឹកដីអ៊ុយក្រែន គឺជាគោលដៅស្របច្បាប់ ពីព្រោះអាវុធទាំងនោះនឹងត្រូវបានផ្តល់ទៅឲ្យរដ្ឋាភិបាលអ៊ុយក្រែន ដែលធ្វើសង្រ្គាមប្រឆាំងនឹងប្រជាជនរបស់ខ្លួន និងធ្វើប្រតិបត្តិការយោធាលើជនស៊ីវិលនៅភាគខាងកើតប្រទេស”។

អ្នកការទូត​កំពូល​រុស្ស៊ី​រូបនេះក៏​បាន​បញ្ជាក់​ដែរ​ថា ទីក្រុងមូស្គូ​ស្គាល់​ផ្លូវ​ ដែលដឹក​សព្វាវុធទៅឲ្យភាគី​អ៊ុយក្រែនច្បាស់ណាស់។ លោក Lavrov បន្ថែមថា “ដរាបណាអាវុធទាំងនេះបានទៅដល់ទឹកដីអ៊ុយក្រែន វាជាហ្គេមយុត្តិធម៌សម្រាប់ប្រតិបត្តិការពិសេសរបស់យើង”។

ប្រទេសរុស្ស៊ី​បានស្តីបន្ទោសម្តងហើយម្តងទៀត ​ចំពោះ​លំហូរ​អាវុធជា​បន្ត​ទៅ​កាន់​អ៊ុយក្រែន​ពី​បស្ចិមលោក ដោយ​និយាយ​ថា វាជាការចាក់សាំងលើ​ភ្លើង និង​បង្អាក់​ដំណើរការ​ចរចា។

គួរបញ្ជាក់ជាថ្មីថា កាលពីថ្ងៃទី២៤ ខែកុម្ភៈ រុស្ស៊ីបានបើកប្រតិបត្តិការយោធានៅអ៊ុយក្រែន បន្ទាប់ពីសាធារណរដ្ឋផ្តាច់ខ្លួន Donetsk និង Luhansk បានអំពាវនាវសុំជំនួយក្នុងការការពារខ្លួនប្រឆាំងនឹងការបង្កហេតុរបស់អ៊ុយក្រែន៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អ៊ុយក្រែន ព្រមាន ថា កិច្ច ចរចា សន្តិភាព ជាមួយ រុស្ស៊ី កំពុងស្ថិត ក្នុង គ្រោះថ្នាក់ នៃ ការ ដួលរលំ