អ្នកមានៗ អាមេរិក សម្រុកទិញលិខិតឆ្លងដែនមួយទៀតដើម្បីរស់នៅ ប្រទេសផ្សេង

ក្រុមហ៊ុនវិនិយោគអ្នកធ្វើចំណាកស្រុកជាច្រើនបានប្រាប់សារព័ត៌មាន Business Insider ថា ចំនួនមហាសេដ្ឋីអាមេរិកដែលដាក់ពាក្យសុំសញ្ជាតិ ឬស្នាក់នៅក្នុងប្រទេសផ្សេងបានកើនឡើងយ៉ាងខ្លាំងក្នុងរយៈពេល ៣ ឆ្នាំចុងក្រោយនេះ ខណៈសហគ្រិនបច្ចេកវិទ្យា និងតារាល្បីៗចាត់ទុកវាថាជា “ផែនការ B” សម្រាប់គ្រួសាររបស់ពួកគេ ។

បើយោងតាមទស្សនាវដ្តី Forbes បានឲ្យដឹងថា ប្រទេសជាច្រើនបានផ្ដល់ “លិខិតឆ្លងដែន និងទិដ្ឋាការមាស” ដែលអនុញ្ញាតឲ្យជនបរទេសមានទ្រព្យសម្បត្តិទទួលបានសញ្ជាតិ ឬការស្នាក់នៅ ជាថ្នូរនឹងការវិនិយោគនៅក្នុងប្រទេស ហើយមានតម្លៃចាប់ពី ១.១ លានដុល្លារនៅក្នុងប្រទេសម៉ាល់តា និងរហូតដល់ ៩.៥ លានដុល្លារនៅក្នុងប្រទេសអូទ្រីស ។

លោក Ezzedeen Soleiman ដៃគូគ្រប់គ្រងនៅក្រុមហ៊ុន Latitude Residency & Citizenship បាននិយាយថា “យើងមើលឃើញកម្មវិធីទាំងនេះជាគោលនយោបាយធានារ៉ាប់រង ។ យើងមានមហាសេដ្ឋីមួយចំនួនមករកយើង ហើយសួរថាតើកន្លែងណាដែលល្អបំផុតដើម្បីរស់នៅ ប្រសិនបើមានគ្រោះមហន្តរាយអាកាសធាតុ ឬប្រសិនបើមានព្យុះ ឬជំងឺរាតត្បាតសកលផ្សេងទៀតជាដើម” ។

ក្រុមហ៊ុន Latitude បាននិយាយថា ការដាក់ពាក្យសុំទិញទិដ្ឋាការរបស់ពលរដ្ឋអាមេរិកបានកើនឡើង ៣០០ ភាគរយចន្លោះឆ្នាំ ២០១៩ និង ២០២១ ខណៈក្រុមហ៊ុន Henley & Partners ដែលជាឈ្មួញកណ្តាលផ្ដល់សញ្ជាតិដ៏ធំបំផុតមួយរបស់ពិភពលោកបាននិយាយថា ការលក់ទៅឲ្យជនជាតិអាមេរិកបានកើនឡើងរហូតដល់ ៣២៧ ភាគរយចន្លោះឆ្នាំ ២០១៩ ដល់ ២០២០ និង ១០ ភាគរយនៅឆ្នាំ ២០២១ ។

យោងតាមលោក Dominic Volek ដែលជាប្រធានអតិថិជននៅក្រុមហ៊ុន Henley & Partners បានឲ្យដឹងថា ការកើនឡើងនៅក្នុងចំណោមពលរដ្ឋអាមេរិកបានចាប់ផ្តើមក្នុងអំឡុងពេលរដ្ឋបាលលោក Trump និងក្នុងអំឡុងពេលនៃការបិទខ្ទប់ ដោយសារជំងឺរាតត្បាតកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ លោក បៃដិន ថា ពូទីន កំពុងគ្មានផ្លូវចេញពីសង្គ្រាម អ៊ុយក្រែន